हतियारसहित पक्राउ परेका बोगटीविरुद्ध अभद्र व्यवहारमा मुद्दा

काठमाडौँ — हतियार प्रदर्शन गरेको आरोपमा पक्राउ परेका गुन्डा नाइके चक्रे मिलनका ‘बडिगार्ड’ बैजनाथ २ का गणेश बोगटीविरुद्ध अभद्र व्यवहारमा मुद्दा चलाइएको छ ।

बाँके प्रहरी प्रमुख एसपी सन्तोष राठौरले बोगटीलाई अभद्र व्यवहारमा मुद्दा चलाएर अनुसन्धान थालेको बताए । बाँके बैजनाथ गाउँपालिकाका बोगटीले सार्वजनिक स्थलमा ‘पोइन्ट टुटु बन्दुक’ प्रदर्शन गरेपछि प्रहरीले उनलाई पक्राउ गरेको थियो ।

नेपालगन्जको एक होटल परिसरमा टिकटक बनाउँदा बोगटीको हातमा हतियार देखिएपछि उनी पक्राउ परेका थिए ।

प्रहरीका अनुसार पोइन्ट टुटु बन्दुकसहित बोगटीलाई नेपालगन्ज-१८ बाट पक्राउ गरिएको हो । बरामद भएको बन्दुकको लाइसेन्स रहेको प्रहरीले जनाएको छ ।