हनी ट्र्यापमा पारेर पैसा असुलेको अभियोगमा तीन महिलालाई डेढ वर्ष कैद सजाय

प्रकाशित मिति : मङ्लबार, पुस ३, २०८०

बर्षात ओली, दाङ ।दाङमा एकजना कानुन व्यवसायी पुरुषलाई हनी ट्र्याप पारेर पैसा असुलेको अभियोगमा धरौटीमा छुटेका घोराहीमा तीन महिलालाई अदालतले कैद र जरिवानाको फैसला सुनाएको छ । होटेलमा खाजा खान बोलाएर बलात्कारको मुद्दा हाल्ने धम्की दिई १८ लाख असुल्ने तीन महिलालाई दाङ जिल्ला अदालतले जनही डेढ वर्ष कैद र जरिवाना गर्ने फैसला गरेको अदालतका तहसिलदार निरञ्जनबाबु पाण्डेले बताउँनुभयो ।

जिल्ला न्यायाधीश जगबहादुर पौडेलको एकल इजलासले कानुन व्यवसायीबाट १ लाख नगद र १७ लाख चेक बुझेका घोराही १५ का ३२ वर्षीय सीतादेवी थापा १५ हजार रुपैयाँ, ३५ वर्षीय खुमा वली र ३२ वर्षीय सुष्मा परियारलाई कैदसहित जनही १० हजार रुपैयाँ जरिवाना गर्ने अदालतले फैसला गरेको छ ।

उनीहरूले सुरुमा ५० लाख रुपैयाँको बार्गेनिङ गरेको र अन्तमा १८ लाखमा कुरा मिलाएको यसअघि प्रहरी अनुसन्धानबाट खुलेको थियो । ती महिलाबाट १७ लाखको चेक पनि प्रहरीले बरामद गरेको थियो ।

तत्कालीन एसपी सुरेश काफ्लेको नेतृत्वमा प्रहरीले उनीहरुविरुद्ध ठगी, आपराधिक विश्वासघात तथा आपराधिक लाखसम्बन्धी कसुरको दफा २५३ को उपदफा १ र २ बमोजिम कसुर गरेको अभियोगमा मुद्दा दर्ता गरी प्रहरीले अनुसन्धान गरेर सरकारी वकिल मार्फत अदालतमा मुद्दा चलेको थियो । जिल्ला प्रहरी कार्यालयका प्रमुख राम बहादुर केसीले अदालतको आदेशसँगै प्रहरीले उनीलाई पक्राउ गर्ने तयारी गरेको बताउँनुभयो ।