सशस्त्र प्रहरी महानिरीक्षक कप–२०८० सुरु

काठमाडौँ । सशस्त्र प्रहरी बल, नेपाल प्रधान कार्यालय हलचोक स्वयम्भूमा चैत्र २५ गतेदेखि ‘सशस्त्र प्रहरी महानिरीक्षक कप–२०८०’ सुरु भएको छ । सशस्त्र प्रहरी अतिरिक्त महानिरीक्षक नारायणदत्त पौडेलले दीप प्रज्वलन गरी खेलकुद प्रतियोगिताको शुभारम्भ गरेका हुन् ।

प्रतियोगितामा राष्ट्रिय सशस्त्र प्रहरी बल प्रशिक्षण प्रतिष्ठान र सशस्त्र प्रहरी बल नेपालका बाहिनी मुख्यालयहरू गरी नौ वटा टिमको सहभागिता रहेको छ । प्रतियोगितामा फुटबल, भलिबल, ब्याडमिन्टन र एथलेटिक्स खेलहरू समावेश छन् ।

उद्घाटन खेल अन्तर्गत आइतबार भएको १०० मिटर दौड पुरुषतर्फ नं. ५ बिन्ध्याबासिनी बाहिनी मुख्यालयका सशस्त्र प्रहरी जवान सुशील के.सी, नं. १ बराह बाहिनी मुख्यालय पकली सुनसरीका सशस्त्र प्रहरी जवानद्वय सुशील कुमार यादव र राजु महतो उराव क्रमशः प्रथम, द्वितीय र तृतीय भएका छन् भने १०० मिटर दौड महिलातर्फ नं. १ बराह बाहिनी मुख्यालय पकली सुनसरीका सशस्त्र प्रहरी जवान नानीमायाँ माझी, नं. ९ पशुपतिनाथ बाहिनीका सशस्त्र प्रहरी जवानद्वय पूजा थापा र जोशीला श्रेष्ठ क्रमशः प्रथम, द्वितीय र तृतीय भएका छन् ।