पहिरोले गोठ भत्किदा ३१ खसी–बाख्रा मरे

गोविन्द खड्का,घोराही । भारी वर्षातका कारण पहिरोले गोठ भत्किदा बुधबार राति घोराही–१९ मा ३१ खसी बाख्रा मरेका छन् । अरु दुईवटा बाख्रा घाइते भएका छन् ।

दुईखोलीका नवीन बुढाको घरमाथिबाट आएको पहिरोले गोठ ढल्दा पुरिएर २० वटा खसी बाख्रा मरेको घोराही उपमहानगरपालिका वडा नं. १९ का अध्यक्ष ज्ञानबहादुर रायमाझीले जानकारी दिनुभयो । यसैगरी राम्चेका रविलाल कामीको घरमा पनि माथिबाट झरेको लेदोले गोठ पुरिदा ११ वटा खसी बाख्रा मरेका छन् । दुईवटा बाख्रा घाइते भएका छन् । स्थानीयले सातवटा खसी बाख्रा भने जीवितै उद्धार गर्न सफल भएको अध्यक्ष रायमाझीले जानकारी दिनुभयो । बुढा र कामीका गरी बुधबार राति ३१ खसी बाख्रा मरेका हुन् । खसी, बाख्रा मरेपछि लाखौंको क्षति भएको छ ।

यसैगरी तोसका शिवप्रसाद रानाको घरमाथिबाट आएको पहिरोले पसलको सामान र लत्ताकपडा पुरेको छ भने पाखापानीका जगमान पुनको घरमा खानीगाउँ खोलीगाउँतिरबाट आएको लेदो पसेको छ । घरभित्र पसेको लेदोले बस्नै नसकिने गरी क्षति पु¥याएको पीडितले बताउनुभयो । यसैगरी चरिवाङका नीमा भण्डारीको घर मुनिको ढिक खस्दा घर जोखिममा परेको छ । घरमा बस्नै नसकिने अवस्था रहेको पीडितले बताउनुभयो । भण्डारीको घर भत्किने खतरामा रहेको छ । यस्तै वडा नं. १९ कै पाँच पोखरीका नन्दराम घर्तीको र तोसका मोहन बुढाको घर पनि केही दिनअघिको वर्षात्ले भत्किएको अध्यक्ष रायमाझीले बताउनुभयो ।

यसैगरी पहिरोले सैघा प्रवेश गर्ने सबै सडक बन्द भएका छन् । आवागमन बन्द भएपछि जनजीवन कष्टकर अवस्थामा पुगेको स्थानीयले बताएका छन् । ‘वडामा आउने सबैतिरका सडक बन्द छन्’– अध्यक्ष रायमाझीले भन्नुभयो– ‘विद्युत पनि अवरुद्ध भएको छ ।’ उहाँका अनुसार कोही विरामी भए एम्बुलेन्स, मोटरसाइकल अटो चल्ने अवस्था छैन । कसैका पनि मोबाइल चार्ज गर्न सकिएको छैन ।

यसैगरी कटुवाखोला सतिघाटमा आएको वाढीले काठेपुलको फल्याक बगाएको छ । पुल चढ्न नसकिने खोला तर्न पनि नसकिने भएको छ । घोराही, कटुवाखोला, पलासे हुँदै १९ नम्बर वडा कार्यालय जाने बाटो बन्द भएको छ । त्यस सडकमा पर्ने विद्युतका पोल ढलेका छन् । विद्युतका तारहरु भुईंमा लत्रेका छन् । त्यसकारण वडाका कुनै पनि गाउँमा बत्ती छैन । त्यस बारेमा विद्युत कार्यालयमा जानकारी गराएको तर तुरुन्तै मर्मत गर्न सकिने अवस्था छैन ।

‘अघिल्लो पटक भत्केको सडक भर्खर मर्मत गरेका थियौं’– अध्यक्ष रायमाझीले भन्नुभयो– ‘हिजोको वर्षात्ले झन बर्बाद बनायो । बाटो मर्मत गरेका ठाउँमा झन् ठूलो पहिरो आएको छ ।’ उहाँका अनुसार शहीदमार्गबाट दुईखोली हुँदै सैघा जाने बाटो पनि ठाउँ ठाउँमा पहिरोले बन्द गरेको छ । यसैगरी स्यूजा, खारा, मर्फेस हुँदै सैघा जाने बाटो पनि अवरुद्ध छ । यस पटकको वर्षात्ले निकै ठूलो क्षति गरेकोले वडाले स्थलगत अनुगमन गरिरहेको अध्यक्ष रायमाझीले बताउनुभयो । यसैगरी बुधबार रातिको वर्षात्ले दुईखोलीमा जाली बगाइदिएको घोराही उपमहानगरपालिकाका विपत् व्यवस्थापन शाखाका मदन वलीले जानकारी दिनुभयो । उहाँका अनुसार जाली बगाउँदा भल अनियन्त्रित भई खेतमा पसेको र वस्ती बगाउने जोखिम देखिएपछि बिहीबार बिहान छ बजे डोजर लगाएर खोला ढल्काइएको छ । सेवारखोलाले ठाउँ–ठाउँमा कटान गरेर खेत, विद्युतका पोललगायत विभिन्न संरचनामा क्षति गरेको छ । पीडितहरुलाई सिफारिससहित रोकथाम तथा क्षतिपूर्तिका लागि उपमहानगरमा आउन आग्रह गरिएको वलीले बताउनुभयो ।