रोल्पाली उवा समाजको राँके शुरु

दाङ/ रोल्पाली उवा सेवा समाज दाङको आयोजनामा मंगलबारदेखि घोराही–१३ तुरुन्तपुरमा राँके तिहारको अवसरमा भुम्या नाच शुरु भएको छ ।

समाजका अध्यक्ष जीवन रोका मगरको अध्यक्षता एवं घोराही उपमहानगरपालिकाका मेयर नरुलाल चौधरीको प्रमुख आतिथ्यतामा भुम्यानाच उद्घाटन भएको थियो । रोल्पा उवामा जन्म भई दाङ बसाइ सरी आएकाहरुले संस्कृतिको संरक्षण गर्न नाच शुरु गरेका छन् । विधिवत संस्था दर्ता गरी आफ्नो संस्कार संस्कृतिको जगेर्ना गर्न लागेको अध्यक्ष रोकाले बताउनुभयो । कला संस्कृति संस्कारलाई बचाउन, युगअनुसार परिमार्जन र विकास गर्न आवश्यक रहेको प्रमुख अतिथि चौधरीको भनाइ थियो । राज्यको तर्फबाट सबैका संस्कार संस्कृतिलाई उत्तिकै सम्मान गर्ने बताउनुभयो । आवश्यक साथ समर्थन गर्ने भनाइ उहाँको थियो ।

साउन ५ गतेसम्म नाच सञ्चालन गरिने समाजले जनाएको छ । कार्यक्रममा घोराही–१४ का अध्यक्ष भानसिंह बुढा मगर, थबाङ गाउँपालिकाका पूर्वअध्यक्ष वीरबहादुर घर्ती मगर, नेपाल मगर संघका घोराही नगर समितिका कावा सचिव गणेशप्रताप पुन मगरलगायतले शुभकामना मन्तव्य व्यक्त गर्नुभएको थियो । कार्यक्रमको सञ्चालन समाजका सल्लाहकार बेदु बुढा मगरले गर्नुभएको थियो ।

उवा घुस्बाङ समाजको राँके तिहार बडहरामा

यसैगरी उवा घुस्बाङ खाम समाज दाङको आयोजनामा घोराही–१३ बडहरामा मंगलबार राँ‘के तिहारको अवसरमा भुम्यानाच शुरु भएको छ । समाजका अध्यक्ष रामलाल घर्ती मगरको अध्यक्षता एवं घोराही–१३ का अध्यक्ष डुल्लुराम पोख्रेलको प्रमुख आतिथ्यमा उद्घाटन गरिएको हो । कला संस्कृतिको संरक्षण गर्न वडा कार्यालयले गर्न सक्ने सबै सहयोग गर्ने प्रमुख अतिथि वडाध्यक्ष पोख्रेलको भनाइ थियो । उक्त भुम्या नाच साउन ५ गतेसम्म चल्ने समाजले जनाएको छ । उक्त कार्यक्रमका विशिष्ट अतिथि अठार मगरात मगर खाम तथा संस्कृति विकास मञ्चका केन्द्रीय अध्यक्ष चन्द्रज्योति बुढा मगरले मगर समुदायले आफ्नो विशेष पर्व भव्य बनाउन आग्रह गर्नुभयो । कार्यक्रममा स्वागत उपाध्यक्ष लक्ष्मी घर्ती मगरले र सञ्चालन सचिव आशबहादुर घर्ती मगरले गर्नुभएको थियो ।