कुकुरलाई पिटेको भन्दै १८ वर्षीय छोराले गरे बुवाको हत्या

काठमाडौं । नवलपरासी (बर्दघाट–सुस्तापूर्व)मा छोराले बुवाको हत्या गरेका छन् ।

जिल्लाको कावासोती–५ ठकुरीचोकका १८ वर्षीय निराजन कुमालले ढुङ्गा प्रहार गरी आफ्नै बुबाको हत्या गरेका हुन् ।

निराजनले हानेको ढुंगा टाउकोमा लागेर उनका बुबा ४३ वर्षीय प्रेम कुमालको मृत्यु भएको प्रहरी नायब उपरीक्षक बेदबहादुर पौडेलले जानकारी दिए ।

पौडेलकाअनुसार आफ्नो घरमा पालेको कुकुरलाई बुबाले पिटेको विषयमा झगडा पर्दा छोराले प्रहार गरेको ढुङ्गा टाउकोमा लागेर बुबाको घटनास्थलमै मृत्यु भएको हो ।

घटनास्थलमा प्रहरी निरीक्षक विक्रम रिजालको नेतृत्वमा सात सदस्यीय प्रहरी टोली परिचालन गरी हत्यामा संलग्न निराजनलाई नियन्त्रणमा लिई थप अनुसन्धान थालिएको उनले बताए ।