यातायात कार्यालयमा टोकन प्रणाली गर्न निर्देशन

लुम्बिनी प्रदेशका उद्योग, पर्यटन तथा यातायात मन्त्री प्रचण्ड विक्रम न्यौपानेले यातायात कार्यालयहरूमा अनिवार्य टोकन प्रणाली लागु गर्न कार्यालय प्रमुखहरुलाइ निर्देशन दिनुभएको छ ।

भालुबाङस्थित मन्त्रालयमा कार्यालय प्रमुखसहितको वार्षिक समीक्षा कार्यक्रममा मन्त्री न्यौपानेले यातायात कार्यालयहरुमा सेवाग्राहीले भोग्दै आएका समस्या तत्काल समाधान गर्न निर्देशन दिनुभयो । यातायात कार्यालयहरुमा टोकन प्रणाली लागु नहुँदा सेवाग्राहीहरु लामो समयसम्म लाइन बस्नुपर्ने समस्या रहेको भन्दै टोकनकै आधारमा सेवा प्रवाह गर्न निर्देशन दिनुभएको हो ।

मन्त्री न्यौपानेले भनसुनका आधारमा सवारी चालक अनुमतिपत्र दिन नहुने भन्दै यसमा कडा नियमन गर्न पनि कार्यालय प्रमुखलाई निर्देशन दिनुभयो । सवारी साधन चलाउन पोख्त भएकालाई मात्रै उनीहरुको क्षमताका आधारमा लाइसेन्स वितरण गरिनुपर्ने भन्दै मन्त्री न्यौपानेले लाइसेन्स लिइसकेपछि सवारी साधन चलाउन सिक्ने प्रवृत्ति रोक्नुपर्ने बताउनुभयो । यसैगरी मन्त्री न्यौपानेले पर्यटन विकासका सन्दर्भमा प्रदेशका पर्यटकीय स्थलहरुको भरपुर प्रचारप्रसार गरेर पर्यटकको आगमन बढाउने गरी काम गरिनुपर्ने बताउनुभयो ।