अल्लु अर्जुन बने सबैभन्दा धेरै पारिश्रमिक लिने अभिनेता

मुम्बई । साउथ सुपरस्टार अल्लु अर्जुनको बहुप्रतिक्षित फिल्म ‘पुष्पा २: द रुल’ छिट्टै रिलिज हुँदैछ । फिल्मलाई लिएर दर्शकमाझ निकै चर्चा चलिरहेको छ । डिसेम्बरको पहिलो साताबाट दर्शकले चलचित्रको मज्जा लिन सक्नेछन् ।

यो वर्षको सबैभन्दा चर्चामा रहेको चलचित्र बनेको छ । यो फिल्म ठूलो बजेटमा बनेको हो जसका लागि कलाकारले चर्को पारिश्रमिक पनि लिएका छन् ।

ट्र्याक टलिउडको रिपोर्ट अनुसार अल्लु अर्जुनले धेरै फिल्मको कूल कलेक्सनलाई उछिन्दै एउटा फिल्मको लागि ३०० करोड भारु शुल्क लिएका छन् । उनी सबैभन्दा बढी पारिश्रमिक लिने भारतीय कलाकारको सूचीमा शीर्ष स्थानमा पुगेका छन् । यो सूचीमा उनले रजनीकान्त र शाहरुख खानजस्ता सबैभन्दा धेरै कमाउने सुपरस्टारलाई पनि पछि पारेका छन् ।

सूचीमा दोस्रो स्थानमा परेका अभिनेताको नाम थलापथी विजय हो । रिपोर्टलाई विश्वास गर्ने हो भने विजयले आफ्नो अन्तिम फिल्मका लागि २७५ करोड भारु लिएका थिए । तेस्रो नम्बरमा किंग खानको नाम छ । शाहरुख खानले एउटा फिल्मका लागि २५० करोड पारिश्रमिक लिने गरेका छन् । चौथो स्थानमा रजनीकान्त छन् जसको पारिश्रमिक १२५ देखि २७० करोड भारु रहेको छ ।

सुकुमारको निर्देशनमा बनेको फिल्म ‘पुष्पा २’ आगामी डिसेम्बर ४ बाट हलमा रिलिज हुँदैछ । फिल्मको ट्रेलर रिलिज भइसकेको । फिल्ममा अल्लु अर्जुनका अलावा रश्मिका मन्दाना र फहद फासिल पनि देखिनेछन् ।