भारतीय स्थल सेनाध्यक्ष जनरल उपेन्द्र द्विवेदीको औपचारिक भ्रमण सम्पन्‍न

बिनिता शर्मा, काठमाडौँ ।   भारतीय स्थल सेनाध्यक्ष जनरल उपेन्द्र द्विवेदीको औपचारिक भ्रमण सम्पन्‍न भएको छ ।

प्रधान सेनापति महारथी श्री अशोक राज सिग्देलको औपचारिक निमन्त्रणामा नेपाल भ्रमणमा आउनु
भएका मित्रराष्ट्र भारतका स्थल सेनाध्यक्ष जनरल उपेन्द्र द्विवेदी (General Upendra Dwivedi PVSM,
AVSM) तथा श्रीमती सुनिता द्विवेदी पाँच दिने औपचारिक भ्रमण सम्पन्‍न गरी आज मिति २०८१ मंसिर ०९ गते
स्वदेश फिर्ता हुनु भएको छ ।

उहाँलाई त्रिभुवन अन्तर्राष्ट्रिय विमानस्थलमा युद्धकार्य विभागका विभागीय प्रमुख उपरथी श्री प्रेम ध्वज अधिकारी र उहाँकी धर्मपत्‍नीले बिदाई गर्नु भएको थियो ।

भ्रमणको दौरान जनरल द्विवेदीलाई सम्माननीय राष्ट्रपति श्री रामचन्द्र पौडेलले नेपाली सेनाको मानार्थ महारथीको दर्जाबाट सुशोभित गर्नु भएको थियो । जनरल द्विवेदीले आफ्नो भ्रमणको दौरान सम्माननीय राष्ट्रपति, सम्माननीय प्रधानमन्त्री, माननीय रक्षा मन्त्री र प्रधान सेनापतिसँग छुट्टाछुट्टै शिष्टाचार भेट गर्नु भएको थियो ।

उहाँले शिवपुरीस्थित सैनिक कमाण्ड तथा स्टाफ कलेज र पोखरास्थित पश्चिम पृतना हे.क्वा.को भ्रमण गर्नुका साथै मुस्ताङ्ग स्थित मुक्तिनाथ मन्दिरको दर्शन र माउण्टेन फ्लाईट मार्फत विभिन्न हिमालहरुको अवलोकन समेत गर्नु भएको थियो ।

यस भ्रमणले दुई देशबीच रहंदै आएको सौहार्दपूर्ण सैनिक सम्बन्धलाई अझ सुमधुर एवं प्रगाढ पार्न थप मद्दत पुग्ने विश्वास नेपाली सेनाले लिएको, सैनिक जनसंपर्क निर्देशनालयले जानकारी दिएको छ ।