अवैध लागूऔषध सहित विभिन्न स्थानबाट २८ जना पक्राउ

बिनिता आचार्य,काठमाडौ ।  प्रहरीले अवैध लागूऔषध सहित विभिन्न स्थानबाट २८ जनालाई पक्राउ  गरेको छ ।

कैलाली जिल्लाको धनगढी उपमहानगरपालिका-४ बसपार्कस्थित होटलबाट अवैध लागूऔषध खैरो हेरोइन जस्तो देखिने पदार्थ १ ग्राम २ सय ४० मिलिग्राम सहित अछाम मंगलसेन नगरपालिका-५ बस्ने १७ वर्षीय किशोर समेत २ जनालाई बुधबार दिउँसो प्रहरीले पक्राउ गरेको हो । अस्थायी प्रहरी पोष्ट बसपार्कबाट खटिएको प्रहरीले उनीहरूलाई उक्त पदार्थ सहित पक्राउ गरेको हो ।

यसैगरी कैलाली  जिल्लाको धनगढी उपमहानगरपालिका-६ जंगल रिसोर्ट नजिकबाट अवैध लागूऔषध ब्राउनसुगर जस्तो देखिने पदार्थ १ ग्राम २ सय १० मिलिग्राम सहित २ जनालाई बुधबार साँझ प्रहरीले पक्राउ गरेको छ । पक्राउ पर्नेहरूमा सोही ठाउँ बस्ने २९ वर्षीय दिल बहादुर चौधरी र २६ वर्षीय आशाराम चौधरी रहेका छन् । वडा प्रहरी कार्यालय धनगढी र लागूऔषध नियन्त्रण ब्यूरो शाखा कार्यालय धनगढीबाट खटिएको प्रहरीले उनीहरूलाई उक्त पदार्थ सहित पक्राउ गरेको हो ।

सुनसरी  जिल्लाको हरिनगर गाउँपालिका-१ चप्राहीबाट नियन्त्रित लागूऔषध नाइट्राजेपाम १ सय २० ट्याब्लेट सहित २ जनालाई बुधबार दिउँसो प्रहरीले पक्राउ गरेको छ । पक्राउ पर्नेहरूमा सोही गाउँपालिका-१ दास टोल बस्ने २० वर्षीय प्रकाश कुमार दास र २२ वर्षीय रितेश कुमार मण्डल रहेका छन् । प्रहरी चौकी भुटाहा समेतबाट खटिएको प्रहरीले को.३८ प ३४९२ नम्बरको मोटरसाइकलमा सवार उनीहरूलाई उक्त लागूऔषध सहित पक्राउ गरेको हो ।

यसैगरी सुनसरी  जिल्लाको कोशी गाउँपालिका-१ भन्सार कार्यालय अगाडिबाट अवैध लागूऔषध ब्राउनसुगर जस्तो देखिने पदार्थ करिब ४३ ग्राम ६ सय ४० मिलिग्राम सहित ५ जनालाई बुधबार दिउँसो प्रहरीले पक्राउ गरेको छ । पक्राउ पर्नेहरूमा रामधुनी नगरपालिका- २ बस्ने २६ वर्षीय मनिष चौधरी, धरान उपमहानगरपालिका-१७ बस्ने २८ वर्षीय बेगराज लिम्बु, ३४ वर्षीय सागर राई, रामधुनी नगरपालिका-५ बस्ने २६ वर्षीय बिज्ञान साह र सोही नगरपालिका-९ बस्ने १६ वर्षीय किशोर रहेका छन् । लागूऔषध नियन्त्रण ब्यूरो शाखा कार्यालय विराटनगर र इलाका प्रहरी कार्यालय लौकहीबाट खटिएको प्रहरीले भारतबाट नेपालतर्फ आउँदै गरेका उनीहरूलाई उक्त पदार्थ सहित पक्राउ गरेको हो ।

दाङ  जिल्लाको तुलसीपुर उपमहानगरपालिका-१७ स्थित फोर्टिनाइन चोकबाट अवैध लागूऔषध ब्राउनसगुर जस्तो देखिने पदार्थ २ ग्राम ३ सय ४० मिलिग्राम र ३ थान मोबाइल सहित २ जनालाई बुधबार दिउँसो प्रहरीले पक्राउ गरेको छ । पक्राउ पर्नेहरूमा सोही ठाउँ बस्ने २७ वर्षीय सुधन नेपाली र २८ वर्षीय बिरन नेपाली रहेका छन् । इलाका प्रहरी कार्यालय तुलसीपुरबाट खटिएको प्रहरीले उनीहरूलाइ उक्त पदार्थ सहित पक्राउ गरेको हो ।

सर्लाही जिल्लाको  बागमती नगरपालिका-१२ बथाने टोल बस्ने ७६ वर्षीय मान बहादुर बललाई अवैध लागूऔषध गाँजा १६ किलो ५ सय ग्राम सहित बुधबार दिउँसो प्रहरीले पक्राउ गरेको छ । इलाका प्रहरी कार्यालय कर्मैया र इलाका प्रहरी कार्यालय हरिवनबाट खटिएको प्रहरीले उनको घर तलासी गर्दा उक्त गाँजा फेला पारी पक्राउ गरेको हो ।

यसैगरी सर्लाही  जिल्लाको ईश्वरपुर नगरपालिका-१२ स्थितबाट अवैध लागूऔषध गाँजा करिब ७ किलो २ सय १० ग्राम सहित २ जनालाई बुधबार राति प्रहरीले पक्राउ गरेको छ । पक्राउ पर्नेहरूमा भारत सीतामाढी सोनवर्षा थाना पञ्चायत ईनरवा सोहरवा ग्राम-१७ बस्ने ३० वर्षीय शम्भु कुमार कुशवाहा र सीतामाढी सोनवर्षा थाना पञ्चायत ईनरवा सोहरवा ग्राम- १६ बस्ने २५ वर्षीय संजय ठाकुर शर्मा रहेका छन् । अस्थायी प्रहरी पोष्ट कालिन्जोर घारीबथान र इलाका प्रहरी कार्यालय केशरगंजबाट खटिएको प्रहरीले ज.१२ प ९०९९ नम्बरको मोटरसाइकलमा सवार उनीहरूलाई उक्त गाँजा सहित पक्राउ गरेको हो ।

रूपन्देही  जिल्लाको तिलोत्तमा नगरपालिका-४ डिङ्गानगरबाट अवैध लागूऔषध ब्राउनसुगर जस्तो देखिने पदार्थ करिब ७ सय ७० मिलिग्राम सहित ३ जनालाई बुधबार राति प्रहरीले पक्राउ गरेको छ । पक्राउ पर्नेहरूमा बुटवल उपमहानगरपालिका-११ कालिकानगर बस्ने ३२ वर्षीय सिद्धान्त गुरूङ, २२ वर्षीय सन्दिप नेपाली र तिलोत्तमा नगरपालिका-४ बस्ने ३४ वर्षीय युकेन थापा रहेका छन् । वडा प्रहरी कार्यालय बुटवल र लागूऔषध नियन्त्रण ब्यूरो शाखा कार्यालय भैरहवाबाट खटिएको प्रहरीले उनीहरूलाई उक्त पदार्थ सहित पक्राउ गरेको हो । थप अनुसन्धानको क्रममा बुटवल उपमहानगरपालिका-११ बाट सोही उपमहानगरपालिका-८ सुख्खानगर बस्ने १८ वर्षीय किशोरलाई अवैध लागूऔषध ब्राउनसुगर जस्तो देखिने पदार्थ करिब २ ग्राम २ सय ३० मिलिग्राम सहित प्रहरीले पक्राउ गरेको छ । साथै उनीहरूले प्रयोग गरेको १ थान मोटरसाइकल र १ थान स्कुटर समेत प्रहरीले बरामद गरेको छ ।

यसैगरी रूपन्देही जिल्लाको बुटवल उपमहानगरपालिका-११ भगवती टोलस्थित मेडिकल पसलबाट नियन्त्रित लागूऔषध टापेन्टाडोल १ सय ७० ट्याब्लेट सहित पसलका संचालक सोही उपमहानगरपालिका-११ देवीनगर बस्ने ४० वर्षीय सरोज भन्ने सर्जु चौधरीलाई बुधबार दिउँसो प्रहरीले पक्राउ गरेको छ । इलाका प्रहरी कार्यालय बुटवलबाट खटिएको प्रहरीले उक्त मेडिकल पसल तलासी गर्दा उक्त लागूऔषध फेला पारी पक्राउ गरेको हो ।

पर्सा  जिल्लाको वीरगंज महानगरपालिका-१६ रजतजयन्ती चोकबाट अवैध लागूऔषध ब्राउनसुगर जस्तो देखिने पदार्थ करिब २ सय २० ग्राम सहित ४ जनालाई बुधबार साँझ प्रहरीले पक्राउ गरेको छ । पक्राउ पर्नेहरूमा भारत बिहार मोतिहारी थाना रक्सौल नगरपंचायत बस्ने ४८ वर्षीय अमित कुमार श्रीवास्तव, ३७ वर्षीय कृष्णा कुमार, ३८ वर्षीय सधिर कुमार कुश्वाहा र २७ वर्षीय राजा कुमार यादव रहेका छन् । जिल्ला प्रहरी कार्यालय पर्सा र प्रहरी चौकी इनर्वाबाट खटिएको प्रहरीले रक्सौलबाट वीरगंजतर्फ आउँदै गरेको बीआर ०६ डीई ०००७ नम्बरको स्कारपियोमा सवार उनीहरूलाई उक्त पदार्थ सहित पक्राउ गरेको हो ।

झापा  जिल्लाको अर्जुनधारा नगरपालिका-११ स्थित कान्तिपुर ड्राईभिङ सेन्टर छेउबाट अवैध लागूऔषध खैरो हेरोइन जस्तो देखिने पदार्थ ३ सय ४० मिलिग्राम सहित बिर्तामोड नगरपालिका-४ अन्नपूर्ण चोक बस्ने ३२ वर्षीय बिकी साहलाई बुधबार राति प्रहरीले पक्राउ गरेको छ । अस्थायी प्रहरी पोष्ट नयाँ बसपार्कबाट खटिएको प्रहरीले उनलाई उक्त पदार्थ सहित पक्राउ गरेको हो ।

बाँके जिल्लाको नेपालगंज उपमहानगरपालिका-१ विशालनगर चोकबाट अवैध लागूऔषध ब्राउनसुगर जस्तो देखिने पदार्थ ५ ग्राम ७ सय ९० मिलिग्राम सहित २ जनालाई बुधबार राति प्रहरीले पक्राउ गरेको छ । पक्राउ पर्नेहरूमा सोही ठाउँ बस्ने २९ वर्षीय सतिस कुमार सोनी र २६ वर्षीय आकास वढई रहेका छन् । जिल्ला प्रहरी कार्यालय बाँके र लागूऔषध नियन्त्रण ब्यूरो शाखा कार्यालय नेपालगंजबाट खटिएको प्रहरीले भे.८ प ८७८ नम्बरको मोटरसाइकलमा सवार उनीहरूलाई उक्त पदार्थ सहित पक्राउ गरेको हो ।

यस सम्बन्धमा प्रहरीले आवश्यक अनुसन्धान गरिरहेको, प्रहरी प्रधान कार्यालयका प्रबक्ता DIGP दिनेश आचार्यले जानकारी दिनुभयो ।