२४ वर्षपछि बारको महासचिवमा एमालेको ‘कमब्याक’, को हुन् कोइराला ?

काठमाडौँ । नेपाल बार एसोसिएसनको २७ औँ केन्द्रीय कार्यसमितिमा प्रा.डा. विजयप्रसाद मिश्रको प्यानल निर्वाचित भएको छ ।

उक्त प्यानलबाट नेकपा एमालेनिकट प्रगतिशील कानुन व्यवसायी संगठन (पीपीएलए)का वरिष्ठ अधिवक्ता केदारप्रसाद कोइराला महासचिवमा निर्वाचित भएका छन् । कोइरालाले राष्ट्रिय स्वतन्त्र पार्टी (रास्वपा)निकट यज्ञमणि न्यौपानेलाई दुई हजार ३६७ मतले हराएका हुन् ।

कोइरालाले ४ हजार ८७४ मत पाउँदा न्यौपानेले २ हजार ३६७ मत प्राप्त गरेका छन् । महासचिव पदमा पीपीएलएको ‘कमब्याक’ २४ वर्षपछि हो । २०५७ सालमा पीपीएलएका सतिशकृष्ण खरेल महासचिव निर्वाचित भएकोमा त्यसयता पीपीएलएले अध्यक्षसहित अन्य पदहरु जिते पनि महासचिव जित्न सकेको थिएन । यसबीचमा पीपीएलएबाट शम्भु थापा, विश्वकान्त मैनाली र हरिकृष्ण कार्कीले अध्यक्षका रुपमा बारको नेतृत्व भने सम्हालेका थिए ।

को हुन् कोइराला ?

२४ वर्षपछि बारको महासचिव पद फर्काउने वरिष्ठ अधिवक्ता कोइराला तीन दशकदेखि कानुन व्यवसायीका रुपमा सक्रिय छन् । उनले दर्जनौँ कानुनी अनुसन्धान र कानुनी शिक्षामा योगदान पुर्‍याएका छन् ।

कोइरालाले त्रिभुवन विश्वविद्यालयअन्तर्गत नेपाल ल क्याम्पसबाट २०४४ मा स्नातक र २०४८–२०५१ मा स्नातकोत्तर गरेका हुन् । उनले पूर्वाञ्चल विश्वविद्यालयअन्तर्गत स्कुल अफ लबाट २०६०–६२ मा दोस्रोपटक वाणिज्य तथा अन्तर्राष्ट्रिय व्यापार कानुनमा दोस्रोपटक स्नातकोत्तर गरेका थिए । उनलाई सर्वोच्च अदालतको पूर्ण इजलासले २०८१ भदौ २१ गते वरिष्ठ अधिवक्ताको मानार्थ उपाधि प्रदान गर्‍यो ।

२०५० सालदेखि वकालत गर्दै आएका कोइरालाले मानव अधिकार र सामाजिक मुद्दाहरुमा बहस गर्दै आएका छन् । उनले विभिन्न जिल्ला अदालत, उच्च अदालत पाटन र सर्वोच्च अदालतमा वकालत गर्दै आएका छन् ।

यसका साथै विभिन्न सार्वजनिक संस्थान, स्थानीय निका र वित्तीय संस्थाहरुमा पनि उनी कानुनी सल्लाहकारका रुपमा आवद्ध छन् । नेपाल विद्युत् प्राधिकरणको मध्य मस्र्याङ्दी जलविद्युत आयोजनाको दाबी समाधान समितिमा कानुनी सल्लाहकारको रुपमा कार्यरत छन् । त्यसबेला उनले श्रम व्यवस्थापन विवाद समाधानका लागि सरकारद्वारा गठित खिम्ती जलविद्युत परियोजनाको न्यायाधीकरण सदस्यका रुपमा काम गरेको अनुभव पनि उनीसँग छ ।

बैंक तथा वित्तीय संस्थाहरुमा पनि कानुनी परामर्शदाताका रुपमा काम गरिरहेका उनले नेपाल बार काउन्सिल तथा अधिवक्ताहरुका लागि विशेष प्रशिक्षण पनि दिने गरेका छन् ।

कोइराला सन् १९९५ मा सिड्नी विश्वविद्यालय सिड्नीमा भएको संयुक्त राष्ट्र संघ प्रणाली र अन्तर्राष्ट्रिय कानुनसम्बन्धी प्रशिक्षकका रुपमा नेपालबाट सहभागी भएका थिए ।

नेपालमा कानुनी शिक्षा, सुशासनमा सहभागिता र मानव अधिकार सचेतनामाला जस्ता पुस्तक समेत प्रकाशन गरेका उनका संविधान, बैंकिङ, बीमा, व्यापार र लगानी कानुनसम्बन्धी तीन दर्जनभन्दा बढी अनुसन्धानात्मक लेख प्रकाशित छन् ।

बार महासचिव उम्मेदवारका रुपमा कोइरालाले न्यायमा चुस्तता, ढिलासुस्ती र असमानताको अन्त्य र कानुन व्यवसायीको हकहितका लागि काम गर्ने एजेण्डा अघि सारेका थिए ।