रुसमा ८.७ रेक्टरस्केलको शक्तिशाली भूकम्प

काठमाडाैं। रूसको काम्चात्का पेनिन्सुलाको पूर्वी समुद्रतट नजिक ८.७ म्याग्निच्युडको शक्तिशाली भूकम्प गएको छ। भूकम्प सुरुमा ८.० म्याग्निच्युड मापन गरिएको थियो तर पछि अमेरिकी भूगर्भ सर्वेक्षणले यसलाई ८.७ मा स्तरोन्नति गरेको छ।

यो भूकम्प अवाचा खाडीको तटवर्ती क्षेत्रमा लगभग १६५,००० जनसंख्या भएको शहर पेट्रोपाभ्लोभ्स्क-कामचट्स्कीबाट लगभग १२५ किलोमिटर दक्षिणपूर्वमा १९.३ किलोमिटरको गहिराइमा गएको थियो।

सखालिन क्षेत्रका अधिकारीहरूले सेभेरो-कुरिलस्कको सानो शहरका बासिन्दाहरूलाई तुरुन्तै खाली गर्न आदेश दिएका छन्। सुनामीको खतरा स्पष्ट भएपछि गभर्नर भ्यालेरी लिमारेन्कोले टेलिग्राम मार्फत निर्णय पुष्टि गरे।

कामचटकामा आपतकालीन सेवाहरूले पनि क्षेत्रको पूर्वी तटमा ३२ सेन्टिमिटरसम्मका छालहरू आउन सक्ने चेतावनी दिँदै विज्ञप्ति जारी गरेका छन्।

जापानको मौसम विज्ञान एजेन्सीले पनि जापानका तटीय क्षेत्रहरूमा १ मिटर अग्लोसम्म छाल आउन सक्ने भन्दै सतर्कताको सूचना जारी गरिएको जापानको सार्वजनिक प्रसारण संस्था एनएचकेले जनाएको छ।

प्रशान्त सुनामी चेतावनी केन्द्रले प्रारम्भिक भूकम्पीय मापदण्डका आधारमा व्यापक र खतरनाक सुनामी आउने सम्भावना रहेको जनाएको छ।