समयमै चुनाव हुनेमा आशंका गर्छन् दल, चट्टान झैं दृढ रहेको भन्छ सरकार

काठमाडौँ । शनिबार काठमाडौंमा आयोजित सभामार्फत पूर्वप्रधानमन्त्री तथा नेपाली कम्युनिस्ट पार्टी (नेकपा)का संयोजक पुष्पकमल दाहाल प्रचण्डले फागुन २१ गतेको प्रतिनिधिसभा निर्वाचनको मिति सारिए चुप लागेर नबस्ने चेतावनी दिए । निर्वाचन सार्ने विषयमा विभिन्न हल्ला आइरहेकोप्रति प्रचण्डले सरकारलाई चेतावनीपूर्ण ध्यानाकर्षण गराएका हुन् ।

भदौ २३ र २४ गते जेनजी विद्रोहको बलमा पूर्वप्रधानन्यायाधीश सुशीला कार्की नेतृत्वको अन्तरिम सरकारले जननिर्वाचित संसद् विघटन गरी निर्वाचन घोषणा गरेको थियो । प्रचण्डले अन्तरिम सरकार गठन प्रक्रिया संविधान विपरीत भएपनि विशेष परिस्थितिप्रति मध्यनजर गरी आफूहरूले सहजीकरण गरेको जिकिर गरे ।

‘सरकारलाई हामी भन्न चाहन्छौँ । तपाईंहरू कुनै तर्क र बहानामा निर्वाचनको मिति सार्ने दुस्साहस नगर्नुहोला,’ प्रचण्डले भने, ‘एक हदसम्म संविधान मिचिसकेको छ । तर देशको असहज स्थितिलाई ध्यानमा राखेर अन्तरिम सरकार बनाउन सहजीकरण गरेकै हो  ।‘

उनले बारम्बार संविधान मिच्ने काम भएमा चुप लागेर नबस्ने चेतावनी दिए । ‘यो सरकारले फेरि निर्वाचनको मिति सार्ने, यसलाई धकेल्ने काम गर्‍यो भने फेरि संविधान मिचिन्छ’, प्रचण्डले भने, ‘यदि संविधान बारम्बार मिच्चुभयो भने हामी चुप लागेर बस्ने छैनौँ । केही अहंकारी, दम्भीहरू प्रतिशोध बाहेक केही नदेख्नेहरूले विभिन्न खालका धम्कीका भाषा बोलेका छन् । म आज धम्कीपूर्ण भाषा बोल्न चाहन्नँ । शान्तिपूर्णरुपले निर्वाचन सम्पन्न होस् ।’

नेकपाको सुदूरपश्चिम धनगढीदेखि काठमाडौँसम्म विशाल महासागर उर्लिएको भन्दै प्रचण्डले यसलाई खेलाँची ठानिएमा सरकार विरुद्ध सडकमा आउन बाध्य हुने चेतावनी दिए । उनले जनयुद्ध लडेको तत्कालीन विद्रोही माओवादी र जनआन्दोलनका वास्तविक शक्ति नेकपामै रहेकाले संविधानको मिति सारिएमा आफूहरू रमिते भएर नबस्ने बताए ।

‘यसलाई खेलाँची नठानियोस् । यो शक्तिलाई फेरि जिस्क्याइयो र संविधानसँग खेलबाड गरियो भने यो शक्ति सडकमा आउनेछ । यो यस्तो शक्ति हो, जसले हिजो जनयुद्ध गर्‍यो, अढाई सय वर्षदेखिको राजतन्त्र धरासायी पार्‍यो । यो जुन शक्ति हो, जनआन्दोलनको बलमा राजतन्त्र ढाल्यो । जनयुद्ध र जनआन्दोलनको मूल शक्ति नेकपालाई खेलाँची नठानियोस् । सरकारले ६ महिना वा एक वर्ष समय थप्ने हल्ला पनि सुनेका छौँ । त्यो गर्‍यो भने देश फेरि दुर्घटनामा पर्छ । तर अब दुर्घटनाको बेलामा नेपाली कम्युनिस्ट पार्टी रमिते हुनेछैन’, उनले भने ।

नेकपाले देशभरका जनतालाई निर्वाचनको तयारी गर्न अपिल गरिसकेको र अन्य पार्टीलाई पनि निर्वाचन बिथोल्ने दिशातिर नलाग्न प्रचण्डले आग्रह गरे ।

जेनजी विद्रोहका कारण सत्ताच्युत भएका नेपाली कांग्रेस र नेकपा एमाले संसद् पुनर्स्थापनाका लागि सर्वोच्च अदालत गएका छन् । एमालेका मुख्य सचेतक महेश बर्तौलाले कार्की सरकार गठन र संसद् विघटन दुवै असंवैधानिक भएको निष्कर्षसहित संसद् पुनर्स्थापना हुनुपर्ने मागदाबी सहित अदालतमा रिट दायर गरेका थिए । एमालेले संसद् पुनर्स्थापना र निर्वाचन दुवैलाई ध्यानमा राखेर आन्तरिक गतिविधि बढाइराखेको छ ।

यता निर्वाचनकै पक्षमा दृढ देखिएका कांग्रेस सभापति शेरबहादुर देउवा ओलीसँग भेटवार्ता गरेपछि संसद् पुनर्स्थापनाको मुद्दा लिएर अदालत गएकोमा नेकपा सहितका विपक्षी दलहरू सशंकित देखिएका छन् । जेनजी विद्रोहपछि देउवाको स्वास्थ्य अवस्था बुझ्न भन्दै ओली मंसिर १९ गते देउवा निवास महाराजगञ्ज पुगेका थिए । ओलीसँग छलफलपछि कांग्रेसका प्रमुख सचेतक समेत रहेका श्याम घिमिरे सहित ८ जना संसदले मंसिर २३ गते रिट निवेदन लिएर अदालत गएका थिए ।