खरिद प्रक्रियामा अनियमितता गरेको भन्दै उपाध्यक्षले नै दिए अख्तियारमा उजुरी

काठमाडौँ । पालिकाले खरिद प्रक्रियामा अनियमितता गरेको भन्दै उपाध्यक्षले अख्तियार दुरुपयोग अनुसन्धान आयोगमा उजुरी दिएका छन् ।

ब्याँस गाउँपालिका दार्चुलाका उपाध्यक्ष बिनोद सिंह कुँवरले पालिकाले खरिद प्रक्रियामा अनियमितता गरेको भन्दै अख्तियार दुरुपयोग अनुसन्धान आयोग शाखा कार्यालय महेन्द्रनगर, कञ्चनपुरमा उजुरी दिएका हुन् ।

उजुरीमा आर्थिक वर्ष २०८०/८१ र २०८१/८२ मा गाउँपालिकाको कार्यालय भवन तथा वडा नं. ५ को कार्यालय व्यवस्थापनका लागि खरिद गरिएका विभिन्न सामग्रीमा अनियमितता भएको उल्लेख गरिएको छ । फर्निचर, दराज, कार्पेट, सोफा तथा पालिकाको निवासका लागि निर्माण गरिएका पलङलगायत सामग्रीको परिमाण स्टोरमा दाखिला गरिएको बिलअनुसार नभएको, केही सामग्रीको दररेट बजार मूल्यभन्दा बढी रहेको तथा केहीको गुणस्तर तोकिएको दरअनुसार नभएको आरोप लगाइएको छ ।

यस विषयमा पटक–पटक प्रमुख प्रशासकीय अधिकृतलाई लिखित जानकारी गराउँदा पनि सुनुवाइ नभएको र कार्यपालिका बैठकमा समेत विषय उठाउँदा बेवास्ता गरिएको उपाध्यक्ष कुँवरले बताएका छन् । उक्त खरिद प्रक्रियामा भएको अनियमितताबारे छानबिन गरी आवश्यक कारबाही गर्न उनले माग गरेका छन् ।