ज्ञानसिन्धु कलेज अब डिभाइन एजुकेसन फाउन्डेसनद्वारा सञ्चालन,भोजराज न्यौपाने कलेज प्रमुख नियुक्त

लामो समयदेखि घोराही क्षेत्रबाट सञ्चालन हुँदै आएको ज्ञानसिन्धु कलेज अब तुलसीपुरस्थित डिभाइन एजुकेसन फाउन्डेसनको व्यवस्थापनमा सञ्चालन हुने भएको छ । जिल्लाकै उत्कृष्ट शैक्षिक संस्थामध्ये एक मानिने उक्त कलेजलाई नयाँ व्यवस्थापनका साथ सञ्चालनमा ल्याइएको हो ।

यसैबीच कलेजको प्रमुखमा शिक्षाविद् भोजराज न्यौपाने नियुक्त हुनुभएको छ । आइतबार आयोजित एक औपचारिक कार्यक्रममा क्याम्पसका प्रमुख सल्लाहकार डा. विष्णुकुमार देवकोटाले नवनियुक्त प्रमुख न्यौपानेलाई पद हस्तान्तरण गर्नुभएको थियो ।

पदभार ग्रहणपछि बोल्दै प्रमुख न्यौपानेले आफू लामो समयदेखि शिक्षा क्षेत्रमा निरन्तर सक्रिय रहँदै आएको उल्लेख गर्दै अझ गुणस्तरीय र व्यवहारमुखी शिक्षा प्रदान गर्ने उद्देश्यले कलेजको नेतृत्व सम्हालेको बताउनुभयो । उहाँले व्यवस्थापन संकायलाई नयाँ सोच र प्रभावकारी व्यवस्थापनका साथ सञ्चालन गरिने जानकारी दिनुभयो । “अब नर्सरीदेखि बीबीएससम्म एउटै शैक्षिक संस्था अन्तर्गत अध्ययन गर्न सकिने व्यवस्था गरिएको छ,” उहाँले भन्नुभयो, “गुणस्तरीय शिक्षा प्रदान गर्ने अभियानमा सबैको साथ र सहयोगको अपेक्षा गर्दछु ।”

कार्यक्रममा कलेजका अध्यक्ष युवराज रावतले जिल्लाकै उत्कृष्ट शैक्षिक गन्तव्यका रूपमा ज्ञानसिन्धु कलेजलाई विकास गर्ने लक्ष्य रहेको बताउनुभयो । व्यवस्थापन संकाय अध्ययनका लागि विद्यार्थीले अब अन्यत्र जानुपर्ने अवस्था अन्त्य गर्ने गरी शैक्षिक वातावरण निर्माण गरिने उहाँको भनाइ थियो । अध्यक्ष रावतले शिक्षा क्षेत्रमा लामो समयसम्म हासिल गरेको अनुभव र ज्ञानलाई अझ व्यवहारिक रूपमा प्रयोग गर्ने उद्देश्यले कलेजलाई नयाँ व्यवस्थापनसहित सञ्चालनमा ल्याइएको बताउनुभयो ।

त्यसैगरी, कलेजको सहायक प्रमुखमा टेकन प्रसाद कँडेल नियुक्त हुनुभएको छ । उहाँले अनुभवी तथा दक्ष शिक्षक मार्फत अध्यापन गराई विद्यार्थीलाई गुणस्तरीय शिक्षा प्रदान गरिने प्रतिबद्धता व्यक्त गर्नुभयो ।

नयाँ व्यवस्थापनसँगै ज्ञानसिन्धु कलेजले शैक्षिक गुणस्तर अभिवृद्धि, आधुनिक व्यवस्थापन प्रणाली र अनुभवी जनशक्तिमार्फत जिल्लामै उत्कृष्ट उच्च शिक्षालयको रूपमा स्थापित हुने लक्ष्य लिएको जनाएको छ । हाल तुलसीपुर स्थित डिभाईन टेम्पल एकेडमीको नव निर्मित संरचना बाट कलेज संचालन हुने भएको छ ।