राइनासका तत्कालीन प्रमुख प्रशासकीय अधिकृतसहित १० जनाविरुद्ध भ्रष्टाचार मुद्दा
अख्तियार दुरुपयोग अनुसन्धान आयोगले प्रधानमन्त्री रोजगार कार्यक्रमको १६ लाख ७२ हजार रुपैयाँ हिनामिना गरेको आरोपमा विशेष अदालतमा आरोपपत्र दायर
काठमाडौँ — अख्तियार दुरुपयोग अनुसन्धान आयोगले लमजुङको राइनास नगरपालिकाका तत्कालीन रोजगार संयोजक शेखरनाथ न्यौपाने र तत्कालीन प्रमुख प्रशासकीय अधिकृत रामचन्द्र अधिकारीसहित १० जनाविरुद्ध भ्रष्टाचार मुद्दा दायर गरेको छ।
आयोगले प्रधानमन्त्री रोजगार कार्यक्रमको १६ लाख ७२ हजार रुपैयाँ हिनामिना गरेको आरोपमा विशेष अदालतमा आरोपपत्र दायर गरेको हो।
प्रधानमन्त्री रोजगार कार्यक्रमअन्तर्गत राइनास नगरपालिकामा सूचीकृत २०७६/०७७ को कार्यक्रम सञ्चालनका लागि श्रम, रोजगार तथा सामाजिक सुरक्षा मन्त्रालयबाट सर्तसहित १६ लाख ७२ हजार रुपैयाँ ससर्त अनुदान उपलब्ध गराइएको थियो। उक्त रकममा तत्कालीन प्रतिवादीहरूले सरकारी सम्पत्ति हिनामिना, दुरुपयोग तथा हानिनोक्सानी गरी आफूहरूले गैरकानुनी रूपमा लाभ लिएको अख्तियारको आरोपपत्रमा उल्लेख छ।
उनीहरूले आर्थिक वर्षको अन्तिम दिन प्रचलित कानुनविपरीत संघीय सञ्चित कोषमा फिर्ता गर्नुपर्ने ससर्त अनुदानबापत प्राप्त रकम फिर्ता नगरी तत्कालीन रोजगार संयोजकले पेस्की लिएको, सो रकम अन्य प्रतिवादीहरूको खातामा जम्मा गरेको र उक्त रकमबाट तोकिएको कार्यक्रम सञ्चालन नै नगरी हालसम्म फर्छ्योट नगरेको आरोपपत्रमा उल्लेख छ।
अख्तियारले उक्त प्रकरणमा मिलेमतो रहेको भन्दै राइनास नगरपालिकाका तत्कालीन रोजगार संयोजक शेखरनाथ न्यौपाने, तत्कालीन प्रमुख प्रशासकीय अधिकृत रामचन्द्र अधिकारी, तत्कालीन लेखापाल नवीनकुमार बराल, वडा नं. १ का तत्कालीन वडा अध्यक्ष रमेश न्यौपाने, वडा नं. ३ का तत्कालीन वडा सदस्य ओजराज पौडेल, वडा नं. ४ का तत्कालीन वडा अध्यक्ष जैमान गुरुङ, वडा नं. ५ का तत्कालीन वडा अध्यक्ष नन्दबहादुर कुमाल, वडा नं. ६ का तत्कालीन वडा अध्यक्ष रूकबहादुर तामाङ गुरुङ, वडा नं. ८ का तत्कालीन वडा अध्यक्ष कृष्णप्रसाद लामिछाने र वडा नं. ७ का तत्कालीन वडा अध्यक्ष माधवप्रसाद पराजुलीलाई प्रतिवादी बनाएको छ।
साथै, न्यौपानेले आफू रोजगार संयोजक पदमा बहाल रहँदा राइनास नगरपालिकाबाट २०७६ वैशाख १६ मा बुझिलिएका एक थान ल्यापटप, एक थान प्रिन्टर र एक थान क्यामेरा २०७७ कात्तिक १ देखि सो कार्यालयबाट बर्खास्त भए तापनि हालसम्म बरबुझारथ नगरेको पनि अख्तियारको आरोपपत्रमा उल्लेख छ। उक्त सामानको परल मूल्य १ लाख ६७ हजार २५६ रुपैयाँ रहेको र सो बराबरको हानिनोक्सानी गरे–गराएको अख्तियारको आरोपपत्रमा उल्लेख छ।
