सकारात्मक पत्रकारिताको खाँचोः सञ्चारमन्त्री कार्की

आज झापाको दमकमा प्रेस सेन्टरले आयोजना गरेको भेटघाट कार्यक्रममा सञ्चारमन्त्री कार्कीले नेपाली मिडियाले सधैँ नकारात्मकतर्फ मात्र केन्द्रित भएकाले अब विकाससँगै सकारात्मक पत्रकारितामा जोड दिनुपर्ने आैँल्याए  ।

उनले सञ्चारमाध्यममा कार्यरत श्रमजीवी पत्रकारको पेसागत सुरक्षा र क्षमता अभिवृद्धि गर्न सरकारले प्राथमिकताका साथ काम गरिरहेको बताए ।

उनले भने – “अब राजनीतिबाहेक विकासका खोजमूलक समाचार पस्कन छिट्टै प्रोत्साहन नीति ल्याउनेछ ।” सरकारले खोजमूलक पत्रकारिता गर्नेलाई सम्मान गर्ने बताउनुहँुदै नेपाल सरकारका प्रवक्ता समेत रहनुभएका मन्त्री कार्कीले भन्नुभयो– “सकारात्मक पत्रकारिताले पेसागत क्षमता विकास हुन्छ ।”

उनले मोफसलका सञ्चारमाध्यमले राजधानीका सञ्चारमाध्यम सँगसँगै प्रतिस्पर्धा गर्न नसकेकाले अब मोफसलमा रहेका सञ्चारमाध्यमको विकासका लागि सरकारले समानुपातिक विज्ञापन नीति ल्याउन लागेको बताए  ।

पूर्व क्षेत्र सञ्चारको पहुँचमा कमजोर भएको बताउँदै उनले मुलुकका सबै ठाउँमा इन्टरनेटको पहुँच बनाउन सरकारले प्राथमिकताका साथ काम गरिरहेको उल्लेख गरे।