विप्लव समूहका जिल्लास्तरीय नेताद्वारा आत्मसमर्पण

बझाङ, असार ५ । विप्लव नेतृत्वको नेकपाका बझाङका एक जना जिल्लास्तरीय नेताले आत्मसमर्पण गरेका छन् ।

जिल्ला शहिद तथा वेपत्ता परिवारका अध्यक्ष रहेका ज्ञानवहादुर चौहानले जिल्ला प्रशासन कार्यालयमा आएर आत्मसमर्पण गरेका हुन् । आफुलाई विप्लव समूहले गरेका गतिविधि चित्त नबुझेको र सर्वसाधारण नागरिक सरहको जीवनयापन गर्न चाहेको भन्दै उनले प्रमुख जिल्ला अधिकारीलाई लिखित निवेदन दिएका थिए ।

नेकपा विप्लवका जिल्ला कमिटी सदस्य तथा खप्तड छान्ना गाउँपालिकाको इन्चार्जसमेत रहेका चौहानले प्रशासनलाई लेखेको पत्रमा विप्लव समूहका कार्यकर्ताको सूचीबाट आफ्नो नामसमेत हटाइदिन अनुरोध गरेका छन् ।

नेकपा विप्लवका जिल्ला कमिटी सदस्य प्रवासले चौहानले पार्टीभित्र अराजक गतिविधी गरेका कारण निष्कासनमा परेकाहरुले आत्मसमर्पण गरेको बताएका छन् ।

यता, जिल्ला प्रहरी कार्यालयमा पनि विप्लब समूहबाट आफ्नो नाम हटाई दिन भन्दै १० जनाले निवेदन दर्ता गराएको जिल्ला प्रहरी कार्यालयका प्रहरी नायब उपरीक्षक सूर्यबहादुर केसीले जानकारी दिए ।

पछिल्लो समयमा जिल्लामा प्रहरीले सकृयता बढाएको र शान्ति सुरक्षामा कडाइ पारेको बताइएको छ ।