प्रकाशित मिति : बुधबार, भदौ १, २०७३
पाल्पा– जिल्लामा राहदानी बनाउनेको सङ्ख्या बर्सेनि घट्दै गएको छ ।
युवाले स्वदेशमै पेसा, व्यवसाय गर्नथालेपछि राहदानी बनाउनेको सङ्ख्यामा कमी आएको हो । आव २०७१/७२ मा सात हजार ७८४ राहदानी तथा आव २०७२/७३ मा छ हजार २६६ राहदानी वितरण गरेको प्रमुख जिल्ला अधिकारी बाबुराम गौतमले जानकारी दिए ।
आव २०७१÷७२ मा साधारण सिफारिसतर्फ छ हजार ८९, दू्रत सिफारिसतर्फ दुई हजार ३१ राहदानी वितरण गरिएकोमा आव २०७२/७३ मा साधारण सिफारिसतर्फ सातहजार ३०३ र दू्रत सिफारिसतर्फ चारहजार ३८० राहदानी सिफारिस गरेको हो । जिल्लामा पशुपालन, तरकारीखेती, कुखुरापालन, च्याउखेती लगायतमा युवाको आकर्षण बढ्न थालेपछि विदेशप्रतिको मोह घटेको बताइएको छ ।
बैंक तथा वित्तीय कारोबारका लागि खुलेका सहकारीबाट ऋण लिएर विभिन्न उत्पादनमुखी काम गर्न थालेपछि यहाँका युवाले रोजगारीका लागि विदेश ताक्न छाडेका छन् । साउदीबाट फर्केर गाईपालन थालेका गणेश न्यौपानेलाई अब विदेश जाने रहर छैन । उनीजस्ता सयौं युवा स्वदेशमा नै व्यवसाय सञ्चालन गर्न थालेका छन् ।
© copyright 2016-2019 and all right reserved to jaljalakhabar | Site By : sobij
