शिक्षक बने मेयरको पीए, विद्यालयमा खेताला !

विराटनगर । विराटनगर महानगरपालिकाले स्थायी शिक्षकलाई मेयरको सचिवालयमा बोलाएर विद्यालयमा खेतला शिक्षक पठाएको छ । प्राथमिक तहका शिक्षक डिकप्रसाद घिमिरेलाई मेयर नागेश कोइरालाको सचिवालयमा काज सरुवा गरेर विद्यालयमा खेताला (सट्टा शिक्षक) पठाएको हो ।

महेन्द्र माध्यमिक विद्यालयका प्राथमिक तहका स्थायी शिक्षक घिमिरेलाई गत जेठमा मेयर कोइरालाले आफ्नो सचिवालयमा ल्याएका हुन् । घिमिरेको स्थानमा करार नियुक्त भएका शिक्षकलाई महानगरपालिकाको कार्यालयले तलब खुवाउनेछ ।

महेन्द्र माध्यमिक विद्यालयकै प्राथमिक शिक्षिका अन्जु खड्का पनि प्रदेश १ योजना आयोगमा काज सरुवा लिएर गएकी छन् । खड्काको गत चैतमा योजना आयोगमा काज सरुवा भएको थियो ।

राजनीतिक पहुँचका आधारमा काजमा गएका शिक्षकको स्थानमा विद्यालयले दुई जना सट्टा शिक्षकलाई करारमा नियुक्त गरेको महानगरपालिकाले बताएको छ । दुई शिक्षकको आवश्यकताका आधारमा काज सरुवा भएपछि विद्यालयमा सट्टा शिक्षक राखिएको विराटनगर महानगरपालिका शिक्षा शाखा प्रमुख दुर्गाप्रसाद खतिवडाले बताए ।