भाइटीका लगाउने भन्दा बालगोपालेश्वर मन्दिर अवलोकन गर्ने अत्यधिक

काठमाडौं । वर्षको एक पटक भाइटीकाको दिन पारेर खुल्ने रानीपोखरी स्थित बालगोपालेश्वरको मन्दिरमा भाइ टीका लगाउने भीड केही कम देखियो । विगतका बर्षहरुमा भाइटीका लगाई दिने र लगाउनेहरुको निकै भिड देखिने बालगोपालेश्वर मन्दिरमा यो पटक टीका लगाउने भन्दा घुमफिर गर्नेहरु बढी देखिन्थे ।

काठमाडौंकी ३० वर्षीया रविना कपालीले बालगोपालेश्वर मन्दिरमा दाजु भाइलाई टीका लगाउँदै आएको २१ वर्ष भयो । ९ वर्षदेखि भाइ टीकाको दिन मन्दिरमा बसेर हजारौंलाई दाजु भाइ बनाएकी रविनाले यो वर्ष पनि भाइटीका गरीन् । दिदीबहिनी नभएका या आफ्नो साथमा नभएर टीका लगाउन नपाएका दाजुभाइहरु रविनाकोे हातको टीका लगाउन रानीपोखरी पुगेका छन् । टीका लगाउने क्रम नै पहिलो भेट भएपनि कति जनासँग निकै आत्मीय सम्बन्ध हुने गरेको रविना बताउनुहुन्छ ।

भुवन दास मानन्धर आफ्नो दुई दिदीबहिनीको मृत्यु भएपछि बालगोपालेश्वर मन्दिरमा गएर हरेक वर्ष भाइटीका लगाउने गरेको बताउनुहुन्छ । मानन्धरले यो वर्ष बाल गोपालेश्वरमा नयाँ बहिनी बनाउँदा आफूलाई निकै खुसी लागेको बताउनुभएको छ ।

हरेक वर्ष हजारौँको संख्यामा बालगोपालेश्वर मन्दिरले हजारौंको संख्यामा दाजुभाइ नभएकालाई दिदीबहिनी र दिदीबहिनी नभएकालाई दाजुभाइ जुराईदिने गर्दछ । दिदीबहिनी विदेशमा भएका वा दाजुभाइ विदेशमा भएकाहरुले पनि यहाँ आएर टिका लगाएका छन् ।

दिदीबहिनी एवं दाजुभाइ नहुनेहरू भाइटीकाका दिन यसै मन्दिरमा गई पूजा, दर्शन गरी टीका लगाउने गर्दछन् । तिहारको पाँचौं दिन भाइटीका पर्व दिदीबहिनीले आफ्ना दाजुभाइलाई श्रद्धा, आस्था र निष्ठाका साथ दीर्घायु, आरोग्य र ऐश्वर्य प्राप्तिको कामना गर्दै परम्पराअनुसार पञ्चरङ्गी वा सप्तरङ्गी टीका लगाइन्छ ।

चुनावका राजधानीबाट थुप्रै मानिस गाउँ फर्किंदा विगतभन्दा को तुलनामा बालगोपालेश्वर मन्दिरमा भाइटीका गर्नेहरुको संख्या घटेको बताइन्छ । आएकाहरु पनि टीकटक र सामाजिक सञ्जालमा रम्न रमाउन आएका देखिन्थे । यो मन्दिर भाइटीकाका दिन मात्र खुल्ने भएकाले पनि धेरैका लागि जिज्ञासा बनेको देखियो ।