महोत्सवको विरोधमा कालो झण्डा लिएर उत्रिए व्यापारी

तुलसीपुरमा आजदेखि सञ्चालन हुन लागेको प्रथम लुम्बिनी प्रदेशस्तरीय महोत्सवको विरोधमा व्यवसायीहरु हातमा कालो झण्डा बोकेर विरोधमा उत्रिएका छन् । गएको मंसिर १५ गते लाग्ने भनिएको मेला व्यवसायीहरुको विरोधका कारण केही दिन स्थगित भइ पुनः आजदेखि सञ्चालन हुँदैछ । मेलाको विरोध भएपछि दाङका प्रमुख जिल्ला अधिकारी हिरालाल रेग्मीको पहलमा तुलसीपुर उद्योग वाणिज्य संघ, मेला आयोजक युथ्स अफ तुलसीपुर र तुलसीपुर उपमहानगरपालिकाका मेयर टिकाराम खड्कालगायतको सर्वपक्षिय बैठकले मेला सञ्चालनका लागि ४ बुदे सहमति बनेको थियो ।

तर सहमति विपरित मेलामा सामान राखिएको भन्दै व्यवसायी विरोधमा उत्रिएका हुन् । मेलामा फेन्सी, जुत्ता, इलेक्ट्रिक सामान राख्न नपाईने सहमति बनेकोमा त्यो निर्णय कार्यान्वय नभएको भन्दै व्यवसायीहरु हात हातमा कालो झण्डा बोकेर तुलसीपुरमा निस्किए हुन् । आन्दोलनरत व्यवसायीहरु विरोध गर्दै अहिले तुलसीपुर उपमहानगरपालिकाको गेटमा धर्ना दिइरहेका छन् । यता मेला आयोजकले भने झाँकी जुलुससहित मेलाको उद्घाटन गर्ने तयारी गरेको छ ।