शाहरूख खानका छोरा आर्यनले विदेशी रक्सी बेच्ने

काठमाडौं । बलिउड सुपरस्टार शाहरुख खानका छोरा आर्यन खानले अब विदेशी मदिरा बेच्ने भएका छन् । व्यापार जगतमा प्रवेश गर्दै उनले विश्वको सबैभन्दा ठूलो मदिरा कम्पनी एबी इनबेभको भारतीय इकाईसँग सम्झौता गरेका छन् । यो कम्पनीले कोरोना जस्ता बियर ब्रान्डको वितरण र मार्केटिङ गर्छ।

रिपोर्टका अनुसार २५ वर्षीय आर्यन खानले आफ्ना व्यापारिक साझेदारहरूसँग भारतमा प्रिमियम भोड्का ब्रान्ड लन्च गर्ने तयारी गरेका छन् । आर्यन खानले आफ्नो अफिसियल इन्स्टाग्राम अकाउन्टमा पनि यसको घोषणा गरेका छन् । उनले लन्च गरेको भोड्का ब्राण्डको नाम डियाभोल हो । जसलाई उनले आफ्ना पार्टनर बन्टी सिंह र लेटी ब्लागोएवासँग लन्च गर्नेछन्।

आर्यन खानले आफ्नो इन्स्टाग्राम अकाउन्टमा डीयाभोलको लोगोसहितको तस्बिर पनि सेयर गरेका छन् । उनले दुई तस्बिर पोष्ट गरेका छन्, जसमा एकमा उनी एक्लै र अर्कोमा आफ्ना साथीसँग देखिएका छन् । यी तस्विरहरूसँग क्याप्सन दिँदै उनले लेखे, ‘यसका लागि करिब पाँच वर्ष लाग्यो। डियाभोल अन्ततः यहाँ छ …।’ प्रयोगकर्ताहरूले उनको यो पोस्टमा लगातार टिप्पणी गरिरहेका छन्।

रिपोर्टका अनुसार आर्यन खान, बन्टी सिंह र लेटी ब्लागोएभाले मिलेर डियाभोल सुरु गर्न स्ल्याब भेन्चर्स नामको कम्पनी बनाएका छन् । जस अन्तर्गत यो भोड्का ब्राण्ड लन्च हुनेछ । यसले यसको वितरण र मार्केटिङका ​​लागि एबी इनबेभको स्थानीय इकाईसँग साझेदारी गरेको छ।

यो अल्ट्रा प्रिमियम भोड्का ब्राण्ड डियाभोल आर्यन खान मार्फत लन्च गरेपछि व्यापार बढाउने योजना पनि रहेको छ, जसलाई एबी इनबेभले मात्रै बिक्री र वितरण गर्नेछ । यसपछि उनीहरूले ह्वीस्की र रम जस्ता ब्राउन स्पिरिट पनि लन्च गर्ने योजना बनाएका छन् ।

इकोनोमिक टाइम्सको रिपोर्ट अनुसार यो साझेदारी अन्तर्गत धेरै उत्पादनहरू बजारमा लन्च हुनेछन्। यसमा आर्यन खानले सन् २०१८ मा जर्मनीमा आफ्ना व्यापारिक साझेदारहरूसँग भेट भएको भन्दै यसबारे चर्चा सुरु भएको बताइएको छ ।