१३ डीआईजी पदका लागि तीब्र प्रतिस्पर्धा

काठमाडौं । प्रहरी महानिरीक्षक, अतिरिक्त महानिरीक्षकको बढुवापछि खाली १३ वटा प्रहरी नायब महानिरीक्षक (डीआईजी)का लागि दौडधूप सुरु भएको छ । राजनीतिक हस्तक्षेपले थङथिलो बनेको प्रहरी संगठनमा केही समय यता सरकारले वरिष्ठतालाई मान्यता दिन थालेपछि सुधारको आशा पलाएको छ । नायव महानिरीक्षक बढुवामा पनि सोही नजिरले काम गरेको अवस्थामा प्रहरीभित्र मनोबल बढ्ने देखिन्छ ।

नेपाल प्रहरीमा १३ वटा नायब महानिरीक्षको पद रिक्त छ । सरकारले दुई पटक गरी ९ डीआईजीलाई एआईजी बनाएपछि नायवमहानिरीक्षक पद खाली भएको हो । चैत ६ मा मन्त्रिपरिषद्ले ५ जना अधिकृतहरूलाई अतिरिक्त महानिरीक्षक मा बढुवा गर्ने निर्णय गरेको थियो ।

बढुवा हुनेमा टेकप्रसाद राई, दीपक थापा, श्यामलाल ज्ञवाली र किरण बज्राचार्य हुनुहुन्छ । उहाँहरुसंगै बढुवा भएका वसन्त कुँवर प्रहरी संगठनकै सारथी बन्न सफल हुनुभएको छ । त्यसलगत्तै अन्य चार डीआईजीलाई एक तह बढुवा भएका छन् । सिफारिस पर्नेहरुमा मिरा चौधरी, सुदिप गिरि, टेक बहादुर तामाङ र सन्दीप भण्डारी हुनुहुन्छ । यद्यपि उहाँहरुको बढुवालाई मन्त्रिपरिषद् बैठकले अनुमोदन गर्न बाँकी नै छ ।

अहिले प्रहरी अतिरिक्त महानिरीक्षक पदमा बढुवा हुने ७ जना हालका महानिरीक्षक कुँवरका ब्याची भएकोको उहाँ सँगै अवकासमा जाने छन । ३१औं प्रहरी महानिरीक्षकको लागि बरियता नमिचिएमा हाल प्रहरी अतिरिक्त महानिरीक्षकमा बढुवा हुँदा तेस्रो नम्बरमा रहेका दीपक थापा दाबेदार हुनु हुने छ । थापा २०५२ भदौ १९ मा प्रहरी सेवामा प्रवेश गर्नुभएको हो ।

३० वर्षे सेवा अवधिको प्रावधान कायम रहेमा प्रहरी महानिरीक्षक वसन्त बहादुर कुँवर २०८१ चैत ४ गतेसम्म आईजीपीमा बहाल रहनु हुने छ । १० महिने कार्यकाल सकेर अवकासमा गएका पूर्व प्रहरी प्रमुख धिरजप्रताप सिंहसंगै उहाँका ब्याची प्रहरी अतिरिक्त महानिरीक्षक सहकुल थापा, दिवेश लोहनी, उत्तराज सुवेदी र प्रहरी नायब महानिरीक्षक मसाउद आलम खाँ, मोहन आचार्य र नल प्रसाद उपाध्याय घर फिर्ता हुनुभएको छ । लामो समयदेखि रिक्त एआईजीमा बढुवासँगै डीआईजीमा रिक्त पदसंख्या १३ पुगेको हो । डीआईजी बढुवा हुने मेरिट लिस्टको पहिलो नम्बरमा जनक भट्टराई हुनुहुन्छ ।

भट्टराईसहित १० जना वरिष्ठ उपरीक्षकमा बढुवा भएका थिए । उनीहरू समेत डीआईजी हुने प्रतिस्पर्धामा छन् । विष्णु कुमार केसी, भरत बहादुर बोहरा, कुबेर कडायत, केदार ढकाल, रवीन्द्र केसी, राजेशनाथ बास्तोला, लालमणि आचार्य, यज्ञ विनोद पोखरेल र चन्द्र कुवेर खापुङ.बरीयतामा अगाडि हुनुहुन्छ ।

२०७७ माघ र २०७८ मंसिरमा बढुवा भएकाहरू डीआईजी बढुवाको अग्रस्थानमा छन् । यसमा अर्जुन चन्द ठकुरी, सुरेन्द्र प्रसाद मैनाली, चक्रबहादुर सिंह र विकाश राज खनाल पर्नुहुन्छ । नवनियुक्त उप्रधान तथा गृहमन्त्री नारायणकाजी श्रेष्ठले कोसेली, पैसा र चाकरी आफ्ना लागि अप्रिय भएको बताउनुभएको थियो । उहाँ आफ्नो बचनमा टिक्नुभयो भने प्रहरी संगठनले बहुआयामिक उपलब्धि हासिल गर्नेमा दुईमत छैन ।