पाथिभरा मन्दिरकाे दर्शन गर्न गएका झापाका पराजुली बेपत्ता

ताप्लेजुङ । पाथिभरा मन्दिरकाे दर्शन गर्नका लागि जाने क्रममा झापाको अर्जुनधारा नगरपालिका-५ का लोकप्रसाद पराजुली बेपत्ता भएका छन् ।

पाथिभरा क्षेत्रमा पर्ने माथिल्लो फेदीमा बास बसेर शुक्रबार बिहान भरिया मार्फत मन्दिरतर्फ जाने क्रममा पराजुलीबीच बाटोदेखि नै बेपत्ता भएका हुन् । भरियालाई पिसाब फेर्न जाने भनेर निस्किएका अन्दाजी ६० वर्षीय पराजुली नफर्किएपछि उनको खोजी कार्य भइरहेको जिल्ला प्रहरी कार्यालय ताप्लेजुङले जनाएकाे छ।

पराजुलीलाई भरियाले यताउति खोजी कार्य गर्दा नभेटेकाे र त्यसपछि प्रहरीलाई खबर गरेकाे प्रहरी कार्यालय ताप्लेजुङका प्रहरी नायव उपरीक्षक राजन लिम्बुले बताउनुभयाे । शुक्रबार बिहानैदेखि प्रहरीको टोलीसहित पराजुलीका आफन्त र स्थानीय सबै मिलेर खोजतलास गरिरहेकाे उहाँकाे भनाइ थियाे । पराजुली मानसिक रुपमा त्यति स्वस्थ नभएको पनि परिवारले बताएकाे उहाँले बताउनुभयाे ।

झापाबाट यहि वैशाख १९ गते श्रीमती, छोरा-बुहारी, नातिनी र आफन्तसहित आएका पराजुली बुधबार बेलुकी माथिल्लो फेदीमा पुगेर होटलमा बास बसेका थिए । पराजुली हिड्न नसक्ने भएपछि बिहीबार बिहान करिब ३ बजेपछि भरिया मार्फत पाथिभरा गएका थिए ।

अरु आफन्तहरू भने हिंड्दै गएकाे प्रहरी कार्यालय ताप्लेजुङले जनाएकाे छ ।