कालीगण्डकी कोरिडोरको बिजोग : बर्खा लाग्यो कि पहिरोको वितण्डा, बस्ती जोखिममा

राष्ट्रिय गौरवको आयोजना मानिने कालीगण्डकी कोरिडोर निर्माण प्रारम्भ भएको दुई दशक बित्नै लाग्दा पनि बिजोग अवस्थामा रहेको छ । हरेक वर्ष जस्तो यो वर्ष पनि वर्षा याममा ठाउँ ठाउँमा पहिरो जाने र खोलामा पुल नबनेका कारण आवतजावत पूर्ण रूपले ठप्प भएको छ ।

बुलिङटार गाउँपालिका वडा नं. एकमा पर्ने कौडेको फुस्रे खोलाको पुल अझै पनि निर्माण हुन नसक्दा स्थानीयहरूलाई सास्ती भएको छ । वर्षामा आउने फुस्रे खोलाको भेललाई तर्न स्थानीयहरू ज्यानको जोखिम राखेर अस्थायी पुलमार्फत आवत जावत गर्ने गरेका छन् । त्यस्तै बुलिङटार गाउँपालिका वडा नं. ६ कै फूलबारी खोलाको पुल पनि पूर्ण रूपले सम्पन्न नहुँदा आवतजावतमा सास्ती हुने गरेको स्थानीय माधव पोखरेलले बताए ।

बुलिङटार गाउँपालिका वडा नं. ६ का दर्जन बढी घरहरू अहिले काली कोरिडोर कै कारण उच्च जोखिममा रहेका छन तर सरोकारवालाहरुको त्यसमा चासो देखिँदैन ।

चीन र भारत जोड्ने आर्थिक समृद्धिको धरोहर मानिएको उक्त सडक खण्ड लामो समय बित्दा पनि निर्माण व्यवसायीहरूको लापरबाहीका कारण सडक बगरमा परिणत भइरहेको जनगुनासो छ । नवलपुर, पाल्पा, गुल्मी, स्याङ्जा र बागलुङ गरी ६ जिल्ला जोड्ने यस सडक खण्डमा कालोपत्रेको काम पनि लामो समयदेखि प्रारम्भ भइसकेको भएता पनि गुणस्तरहीन कालोपत्रे भएपछि अधिकांश ठाउँ बगरमा परिणत भएको हो । निर्माण व्यवसायीहरूको चरम लापरबाही तथा स्थानीय सरकारको पनि यथोचित ध्यानाकर्षण हुन नसक्दा काली गण्डकी कोरिडोर समृद्धिभन्दा पनि अभिशाप बनेको छ ।

कोरिडोर प्रारम्भ जिल्ला नवलपुरको अधिकांश क्षेत्रमा निर्माण कार्यमा चरम लापरबाही भएको जनगुनासो छ ।

हरेक वर्ष कोरिडोर स्तर उन्नतिका लागि सरकारले अरबौँ बजेट छुट्याएपनि काम भने कछुवा गतिमा अघि बढिरहेको छ । कोरिडोर स्तरोन्नतिका लागि यस वर्ष १ अर्ब ९८ करोड बजेट छुट्टाइएको छ ।