फेरि विवाह गर्दैछन् ९३ वर्षीय मिडिया टाइकुन रूपर्ट मर्डक

अवकाश प्राप्त रूसी वैज्ञानिक जुकोभासँग इन्गेजमेन्ट गरेसँगै मर्डक पुन: एक पटक चर्चामा आएका छन्। उनीहरूले विवाह गर्ने पक्का भइसकेको मर्डकको कार्यालयले घोषणा गरेको न्युयोर्क टाइम्सले जनाएको छ।

संसारका विभिन्न देशमा अखबार तथा टेलिभिजन च्यानल सञ्चालन गरेका यी मिडिया टाइकुन आउँदो सोमबार ९३ वर्ष पुग्‍दैछन्।

न्युयोर्क टाइम्सका अनुसार जुकोभा सँगको विवाह समारोह क्यालिफोर्नियास्थित मोरगा सहरमा जुन महिनामा हुने तय भइसकेको छ। विवाहका लागि पाहुनाहरूलाई निमन्त्रणा समेत पठाइसकेको छ।

गत अप्रिलमा मर्डक जुकोभासँग प्रेम सम्बन्धमा रहेको समाचारहरू बाहिरिएका थिए।

त्यसअघि उनले ६७ वर्षीया रेडियो होस्ट एना लेस्ले स्मिथसँगको सम्बन्ध तोडेका थिए। विवाह गर्ने पक्का भइसकेपछि पनि मर्डकले स्मिथसँग इन्गेजमेन्ट गरेको दुई हप्तापछि नै सम्बन्ध टुटाएका थिए। त्यसअघि उनले चार जनासँग विवाह गरी सम्बन्धबिच्छेद गरिसकेका छन्।

उनले अष्ट्रेलियन फ्लाइट एटेन्डेन्ट पाट्रिसिया बुकर, स्कटिस पत्रकार एना म्यान, वेन्डी डेङ र अमेरिकी मोडल तथा कलाकार जेरी हलसँग विवाह गरेका थिए।

यता जुकोभाले पनि पहिले रूसी अर्बपति एलेक्सजेन्डर जुकोभसँग विवाह गरेकी थिइन्।

गत वर्ष मर्डकले फक्स एन्ड न्युज कोर्पोरेसनको अध्यक्ष पद छाडेका थिए।

रूपर्ट मर्डकले सन् १९५० मा अष्ट्रेलियाबाट आफ्नो करियरको सुरूवात गरेका थिए। त्यतिबेला उनले न्युज अफ द वर्ल्ड, सन् १९६९मा बेलायतको द सन समाचार पत्रिका किनेका थिए। पछि उनले अमेरिकी पत्रिका न्युयोर्क पोष्ट र वालस्‍ट्रिट जर्नल पनि किनेका थिए।

सन् १९९६मा उनले फक्स न्युज खोलेका थिए। सन् २०१३ मा खोलेको न्युज कोर्पोरेशनमार्फत उनले विभिन्न देशका स्थानीय तथा अन्तर्राष्ट्रिय मिडिया आउटलेटहरू किनेका थिए।