दीपेश पुनको सहयोगमा जितेका थिए जीबी राईले सम्बन्धविच्छेदको मुद्दा

काठमाडौं – विभिन्न सहकारीमा बचतकर्ताको रकम अपचलन गरी फरार भएका भनिएका गितेन्द्रबहादुर राई (जीबी राई) ले पूर्वउपराष्ट्रपति नन्दबहादुर पुनका छोरा दीपेश पुनको सहयोगमा श्रीमतीसँग सम्बन्धविच्छेद गरेको खुलेको छ । संसदको सहकारी संस्था बचत रकम दुरुपयोग सम्बन्धी विशेष समितिको छानबिनले सो खुलासा गरेको हो ।

राईले आफ्नी पहिली श्रीमतीसँग दीपेश पुनको सहयोगमा सम्बन्धविच्छेदको मुद्दा जितेको र त्यसपछि उनीहरू हेलिकप्टर चढेर ओखलढुंगा सँगै पुगेको समितिको प्रतिवेदनमा उल्लेख छ ।

‘उनकै सहयोगमा जीबी राईले वातावरण बनाई पहिलो श्रीमतीसँग सम्बन्धविच्छेदको मुद्दा जिते । र, हेलिकप्टर चढेर जिल्ला सदरमुकाम ओखलढुंगामा दीपेश–जीबीसँगै पुगेका थिए’, प्रतिवेदनमा उल्लेख छ ।

हेलिकप्टरमा ओखलढुंगा पुगेर फर्केपछि ‘बक्सिस’का रूपमा जीबीले दीपेशहरूको टोलीलाई पोखराको फूलबारी रिसोर्टमा पार्टीसमेत दिएको अनुसन्धानले देखाएको छ । ‘उक्त मुद्दा जिताएबापत ‘बक्सिस’का रूपमा जीबीले दीपेशहरूको टोलीलाई पोखरास्थित रिसोर्टमा पार्टी दिएका थिए’, प्रतिवेदनमा उल्लेख गरिएको छ’, ‘१० लाख रूपैयाँ खर्चको सीमा दिइएको उक्त ‘पार्टी’मा ४ लाख ९० हजार रूपैयाँ खर्च भएको थियो ।’

तर, सम्बन्धविच्छेदको मुद्दामा दीपेशले राईलाई कसरी सहयोग गरे भन्ने बारेमा भने प्रतिवेदनमा खुलाइएको छैन । दीपेश पुनको सहयोगमा मुद्दा जितेर श्रीमतीसँग सम्बन्धविच्छेद भएपछि राई र पुनको बीचमा सम्बन्ध थप प्रगाढ बन्दै गएको र उनीहरू व्यावसायिक साझेदार बन्न सुरु गरेका थिए ।

जीबीसँगको सम्बन्धपश्चात दीपेश बुटवलको सुप्रिम सहकारीको सचिव भएको र उनकै पहलमा गोरखा मिडिया नेटवर्ककको तर्फबाट नागरिकखबरडटकम सञ्चालनमा ल्याइएको अनुसन्धान प्रतिवेदनमा उल्लेख गरिएको छ ।

‘उनी विस्तारै जीबीको व्यावसायिक साझेदार पनि बने, गिट्टी बालुवा खानी उत्खनन् र क्रसर व्यवसायको साझेदार रहेका कैलाश दर्लामी मगरलाई पनि दीपेशले सहकारीमै ल्याए’, प्रतिवेदनमा उल्लेख छ, ‘आफू निकट मान्छे सहकारीहरूमा राख्नकै लागि सुप्रिम सेभिङ एन्ड क्रेडिट को–अपरेटिभ लिमिटेडमा बुटवलमा दीपेश आफैँ सचिव बने ।’
khabarhub bat