थवाङी समाजको नाम्क दुईदिन थप

थबाङी सेवा समाज सांस्कृतिक समूहको आयोजनामा असार १ गते शुरु भएको नाम्क (भुम्या) दुईदिन थप भएको छ ।

शनिबारसम्मका लागि चार जनाले ५० हजारमा किनेको समितिका संयोजक मायापुरा रोकाले जानकारी दिनुभयो । पाँच दिनसम्म चल्ने पर्व सात दिन पुग्ने भएको छ । नेपाल मगर संघका केन्द्रीय उपाध्यक्ष दर्जीत रोकामगर र समस बुढा मगरले १५ हजारका दरले ३० हजार रुपैयाँ दिनुभएको समाजका कोषाध्यक्ष कुमार रोकाले जानकारी दिनुभयो । उहाँका अनुसार बिनरोजी रोका र राष्ट्रिय झाँक्रीले १० हजारका दरले २० हजार गरी ५० हजारमा किन्नुभएको हो । यस बाहेक विभिन्न व्यक्ति र संस्थाले नाम्कलाई नगद सहयोग गर्नुभएको छ ।

‘विदाको दिन पनि छ, धेरै जना जम्मा हुनुभएको छ’– केन्द्रीय उपाध्यक्ष रोकाले भन्नुभयो– यस्तो बेलामा नाम्क थप्दा रामै्र  होला जस्तो लाग्यो ।’ उहाँका अनुसार नाम्क मान्न देश विदेशबाट आउनुभएको छ । धेरै खर्च गरेर टाढा टाढाबाट आउनुभएकालाई रहर पूरा गर्न दिनु उचित लाग्यो । सबैभन्दा ठूलो र लामो समय चल्ने पर्व नाम्क हो । त्यसैले अति महत्व दिइन्छ । घोराही–१३ बडहरामा चलिरहेको नाम्क (भुम्या) मा साँझ पख अत्यधिक भिड लाग्ने गरेको छ । महिला पुरुषको चार लाइनमा गोल घेरा लाग्दा पनि घुमेर नाच्न नमिल्ने गरी बाक्लो उपस्थिति देखिन्छ । खन्जरा नाच्नका लागि भने झनै अपुग देखिन्छ । अत्यधिक भिड भएपछि बिहीबार साँझ अँध्यारो नहुँदै आयोजकले समापन गरेको थियो । यातायात व्यवस्थापन पनि चुनौतीपुर्ण देखिएको थियो ।