खेवाको निधनले प्रचण्ड स्तब्ध

 नेकपा माओवादी केन्द्रले सवारी दुर्घटनामा परी पार्टीको महाधिवेशन आयोजक समितिका सदस्य हरिराज खेवालगायतको निधन भएकोमा गहिरो दुःख व्यक्त गरेको छ ।

सो पार्टीका अध्यक्ष प्रचण्डले आज एक शोक वक्तव्य प्रकाशित गरी धनकुटा क्षेत्र नं २ का पूर्वसभासद् तथा पूर्व अर्थराज्यमन्त्री खेवालगायतको धनकुटाको सिदुवा बजारमा बिहीबार भएको बस दुर्घटनामा परी निधन भएकामा पार्टी स्तब्ध भएको बताएका छन् ।

अध्यक्ष प्रचण्डले शोक सन्तप्त परिवारजनप्रति समवेदना प्रकट गर्दै घाइतेको शीघ्र स्वास्थ्यलाभको कामना पनि गरेका छन् । धनकुटा हात्तिखर्क गाविस वडा नं ६ मा २०२५ साल कात्तिकमा जन्मिएका खेवा सानैदेखि सामाजिक सेवामा क्रियाशील थिए ।

धनकुटा बहुमुखी क्याम्पसबाट उच्च शिक्षा हासिल गरेका खेवाले २०५० सालदेखि २०५४ सम्म जनकल्याण प्रावि हात्तिखर्कमा शिक्षक हुँदै प्रधानाध्यापकसम्म बनेका थिए ।
विसं २०५३ का कम्युनिस्ट पार्टीको सदस्यता प्राप्त गरी २०५४ सालमा सोही गाविसको गाविस अध्यक्षसमेत भएका थिए । नेकपा एमाले, नेकपा माले हुँदै नेकपा माओवादीमा प्रवेश गरेका खेवा २०६४ सालमा भएको संविधानसभाको दोस्रो निर्वाचनमा धनकुटा क्षेत्र नं २ बाट प्रत्यक्ष निर्वाचित सभासद् भएका थिए ।