पाकिस्तानमा इरान र अमेरिकाबीचको वार्ता सकियो, के भयो सहमति ?

एजेन्सी । पाकिस्तानको इस्लामाबादमा इरान र अमेरिकाबीच झन्डै १४ घण्टा लामो ऐतिहासिक वार्ता सम्पन्न भएको छ ।

शनिबार अपराह्नदेखि आइतबार बिहानसम्म दुई चरणमा चलेको छलफलले दशकौँदेखिको तनावबीच नयाँ कूटनीतिक सम्भावनाको संकेत दिएको छ।

इरानी पक्षका अनुसार केही महत्वपूर्ण विषयमा अझै मतभेद कायम रहे पनि वार्ता रोकिएको छैन। दुवै पक्षले संवादलाई निरन्तरता दिने सहमति जनाएका छन्, तर अर्को चरण कहिले बस्ने भन्ने अझै टुंगो लागेको छैन। वार्ता आइतबार पनि जारी रहने संकेत दिएको छ ।

वार्तामा अमेरिकी टोलीको नेतृत्व उपराष्ट्रपति जेडी भान्सले गरेका छन् भने इरानी प्रतिनिधिमण्डलको नेतृत्व संसद् सभामुख मोहम्मद बागेर गालिबाफले गरेका छन् ।

उच्च तहका यी नेताहरूको प्रत्यक्ष सहभागिताले वार्ताको गम्भीरता र महत्व झल्काएको छ।

छलफलका क्रममा इरानले लेबनानमा भइरहेको इजरायलको आक्रमण तत्काल रोक्नुपर्ने माग अघि सारेको छ, जसले क्षेत्रीय सुरक्षालाई वार्ताको केन्द्रमा राखेको देखिन्छ।

यो वार्ता इरानी इस्लामिक क्रान्ति (१९७९) पछि अमेरिकासँग भएको सबैभन्दा उच्चस्तरीय प्रत्यक्ष संवाद मानिएको छ ।