परदेशमा रहेका नेपालीहरूको तिहार: भिडियो कलकै भरमा भाइटीका

काठमाडौँ। रोजगारी, अध्ययन तथा पेसाका सिलसिलामा विदेशमा रहेका हजारौँ नेपालीहरूले यस वर्षको तिहार तथा भाइटीका प्रविधिको प्रयोग गर्दै सामाजिक सञ्जाल र भिडियो कलमार्फत मनाएका छन्। भौतिक रूपमा उपस्थित हुन नसकेपछि परदेशमा रहेका दाजुभाइ र नेपालमा रहेका दिदीबहिनीबिच फोन तथा भिडियो संवादबाटै आशिर्वाद साटासाट गरिएको हो।

बेलायतको लन्डनमा बस्दै आएका पूर्वपत्रकार भगीरथ योगीले चार वर्षदेखि भाइटीकामा घर जान नपाएको न्यास्रो पोख्दै यसपटक सामाजिक सञ्जालबाटै बहिनीहरूसँग भलाकुसारी गरी टीकाको अनुभूति सँगालेको बताएका छन्। त्यस्तै साउदी अरबको दमाममा कार्यरत काभ्रेका समर खड्काले कामको व्यस्तताका बिच दिदीले अन्य दाजुभाइलाई टीका लगाइदिएको भिडियो कलमार्फत हेरेर चित्त बुझाएको सुनाएका छन्।

अस्ट्रेलियाको पर्थमा रहेका सञ्चारकर्मी दामोदर भण्डारी र जापानको टोकियोमा बस्ने भवानी भट्टले पनि नेपालमा रहेका दिदीबहिनीसँग भिडियो कलबाटै कुराकानी गरी दशौँ हजार माइल टाढाबाटै आशिर्वाद थापेको अनुभव व्यक्त गरेका छन्।

साउदी अरबको रियादमा रहेका स्तम्भकार कुमार कार्कीका अनुसार मध्यपूर्वका साउदी, कतार, युएई, बहराइनलगायतका देशमा रहेका नेपालीहरूले एकापसमा नजिकका चेलीबेटी वा नेपाली समुदायबिच भेला भएर दीपावली तथा भाइटीका मनाउने गरेका छन्। पछिल्लो समय आधुनिक प्रविधिको विकासले गर्दा परदेशमा रहेका नेपालीहरूलाई भौतिक दूरी भए पनि चाडपर्वमा परिवारसँग जोडिन केही हदसम्म सहज बनाएको छ।