आतङ्ककारी समूहका प्रमुख सेनापति महमुद ब्यारी अलियास अबु येहियालाई गिरफ्तार

माली– मालीको विशेष सुरक्षा सैनिक दलले अन्सार दिन आतङ्ककारी समूहका प्रमुख सेनापति महमुद ब्यारी अलियास अबु येहियालाई गिरफ्तार गरेको यहाँको सुरक्षा स्रोतले जनाएको छ ।

अन्सार दिन आतङ्ककारी समूहलाई उत्तरी मालीका विभिन्न इलाकामा हिंसात्मक र आतङ्ककारी गतिविधि मच्चाएको आरोप लाग्दै आएको छ ।

त्यस्तै गत वर्षको जुन महिनामा मालीको नारा प्रहरी बाहिनी उपर महमुद ब्यारीको नेतृत्वमा भीषण आक्रमण भएको थियो ।

साथै मध्य मालीको नाम्पालामा अवस्थित एउटा सैनिक क्याम्पमा गत हप्ता मात्र गराइएको आतङ्ककारी आक्रमणमा १७ जना सैनिक मारिनुका साथै अन्य ३५ जना घाइते भएका थिए ।

यस आक्रमण पनि महमुद व्यारी संलग्न रहेकै योजना मुताविक गराइएको भनी सैनिक स्रोतले दावी गरेको छ ।

संदिग्ध महमुद ब्यारी सन् १९७९ मा जन्मेको र मालीको सरकार विरोधी अर्को आतङ्ककारी समूह म्यासिना लिबरेसन फ्रन्टको मुख्य नेता अमादो कोफ्फाको विश्वास पात्रको रुपमा परिचित रहेको सैनिक स्रोतको दाबी छ ।