पाँचथरमा पहिरोका कारण २० दिनदेखि विद्यालय बन्द

गत साउन २७ गएको पहिरोबाट बाटो अवरुद्ध भएर बालबालिका विद्यालय आउँन नसक्दा पाँचथरको फालेलुङ गाँउपालिका–३, मेमेङको खोलाघारीस्थित सिद्धकाली आधारभूत विद्यालय अझै सञ्चालनमा आउन सकेको छैन ।

साउन २७ गते बिहान गएको पहिरोबाट विद्यालय सेवा क्षेत्रका ४१ परिवार विस्थापित भएपछि उक्त विद्यालयका २८ बालबालिका विद्यालय जान सकेका छैनन । पहिरोबाट विस्थापित स्थानीयवासी स्थानीय वुङचिङ डाँडामा बस्दै आएका छन् ।

पहिरोबाट घरहरू बस्न नमिल्ने बनेका र ठाँउ–ठाँउमा धाँजा फाटेर विद्यालय पुग्ने बाटो अवरुद्ध बनेपछि विद्यार्थी विद्यालय पुग्न सक्ने अवस्था नरहेको जिल्ला शिक्षा कार्यालयका अधिकारी चक्रपाण्डे सुवेदीले बताए ।

‘बाटोघाटो सबै बगाएको छ, सबैतिर पानीको दलदल छ’ उनले भने, ‘ विद्यालयमा अध्ययनरत २८ बालबालिकाहरूलाई विद्यालय पठाउनुस भन्ने अवस्था नै छैन ।’

पहिरोका कारण खोलाघारी क्षेत्रका ४१ परिवार आफ्नो बासस्थान छोडेर वुङचिङ डाँडामा वसोबास गरिरहेका छन् । आइतबारबाट विद्यालय लगाउने प्रयास गरेपनि निरन्तर पानी परेका कारण विद्यालय सञ्चालन गर्न नसकिएको विद्यायल व्यवस्थापन समितिका अध्यक्ष सोमकुमार राइले बताए ।

पहिरोले पाँचथरको फालेलुङ ३ र १ मा बढी क्षति गरेको थियो । अझैसम्म पनि निरन्तर पानी परिरहेकाले विद्यालय लगाउन सक्ने अवस्था नभएको स्थानीयको भनाई छ ।

पहिरोको कारण फालेलुङ ३ कै कालिका आधारभूत विद्यालय माङलेवुङ र जनकल्याण आधारभूत विद्यालयलमा समेत एक हप्ताभन्दा  बढी पठन–पाठन अवरुद्ध भएको फालेलुङ गाँउपालिका वडा नं. ३ का वडाध्यक्ष वुद्धिमान सावदेनले बताए ।

सिद्धेश्वरी माध्यमिक विद्यालय जिमाहाको कक्षा ७ मा अध्ययन एक बलिकाको निधन भएको थियो भने अर्की सोही कक्षाकी बालिका अझै बेपत्ता भएको सावदेनले बताए ।

फालेलुङ–१ को मोतिराम आधारभूत विद्यालयमा माथिबाट भित्तो खसेर केही कक्षा कोठाहरूमा क्षति पुर्‍याएको छ भने हिलिहाङ–६ स्थित लिटिल स्टार इङ्लिस वोर्डिङ स्कुल चतुरेका ७ वटा कोठाहरू भत्किएका छन् ।

पहिरोको कारण कक्षा कोठाहरू भत्किएपछि एक हप्तासम्म विद्यालय बन्द भएको र अन्यत्र कक्षाको व्यवस्थापन गरी विद्यालय सुचारु गरिएको विद्यालयका प्रिन्सिपल हरिराज लोवाले बताए ।

पहिरोकै कारण विद्यालय बन्द भएकोबारे आफूलाई कुनै जानकारी नभएको जिल्ला शिक्षा अधिकारी राजकुमार विश्वकर्माले बताए ।