यात्रुबहाक बसले दसैँमा खसीबोका बोक्न नपाउने

यसपालि दसैँमा यात्रुबहाक बसमा खसी–बोका समेत बोक्न नपाइने भएको छ।

दुर्घटना न्युनीकरणको लागि यातायात व्यवस्था विभाग, यातायात ब्यवसायी, ट्राफिक प्रहरी, उपभोक्ता मञ्च लगायतका सरोकारवाला निकायहरुको शुक्रबार बसेको सर्वपक्षीय बैठकले यात्रुबहाक बसमा एक जनाले २० किलोभन्दा धेरै सामान र घरायसी बाहेकका कुनै पनि चिज बोक्न पूर्ण रुपमा बन्देज गरेको हो।

योसँगै २० केजीभन्दा ठूला सामान र खसीबोका समेत मालवाहक गाडीमा पठाउनु पर्ने भएको छ। यदी यसो नभएमा यातायात व्यवस्था विभागले सवारी साधनको इजाजत समेत खारेज गर्न सक्ने विभागका महानिर्देशक रुपनारायण भट्टराइले चेतावनी दिए।

नयाँ नियमले सवारी दुर्घटनामा कमी आउने यातायात व्यवस्था विभागका प्रवक्ता डा. टोकराज पाण्डेको भनाइ छ। अघिल्ला वर्षहरुमा यात्रुबहाक बसमा खसी, बोकाहरु राख्ने गरिए पनि यो वर्ष यसमा कडाई गरिने उनले बताए।

‘आजको सर्वपक्षीय बैठकमा २० किलोभन्दा धेरै सामान र ब्यवसायिक प्रयोजनको सामान नबोक्ने सहमति भएको छ, जसअनुसार कुनै पनि यात्रुबहाक बसले दसैँमा खसीबोका हुटमा वा डिक्कीमा पनि राख्न पाउने छैनन्’ पाण्डेले भने।

पछिल्ला केही दिनदेखि गाडीमा हुट राख्न पाउनुपर्छ भन्दै यातायात ब्यवसायीहरुले लामो दुरीको यातायातको टिकट बुकिङको मिति तोकेका थिएनन्।

दसैँ अगाडिको ८ देखि १० दिनमा उपत्यकाबाट करिव २५ लाख सर्वसाधारण बाहिरिने र उनीहरुको सामान समेत लानुपर्ने भएकोले गाडीमा हुट राख्न पाउनुपर्ने राष्ट्रिय यातायात व्यबसायी महासंघले माग राख्दै आएको थियो।

‘धेरै सामान राखेर सवारी दुर्घटनामा पर्यो भने हाम्रो पनि नोक्सान हुन्छ, यस विषयमा धेरै सजग छौँ तर सार्वजनिक गाडीमा हुट नै नभए सामान कसरी लाने’ राष्ट्रिय यातायात व्यवसायी महासंघका महासचिव सरोज सिटौलाले भने।

आफूहरुले मान्छे बोक्ने उद्देश्यले नभई हलुका सामान बोक्नलाई नै हुट राख्न खोजेको उनले बताए। ‘यदी कुनै गाडीले हुटमा मान्छे वा व्यापारिक प्रयोजनका सामान बोकेको पाइएमा गाडीलाई जे कारबाही गरेपनि महासंघले हस्तक्षप गर्ने छैन’ सिटौलाले भने।