प्रकाशित मिति : आइतवार, अशोज १५, २०७४
विजया दशमीका दिन नेवार समुदायले निकाल्ने खड्ग जात्रामा विभिन्न शक्तिपीठमा तन्त्र साधना गरी खड्ग धारणा गरी टोल तथा गुठीका मानिस निस्कने गर्दछन् ।
काठमाडौंमा टेःबहाल र वटुबाट भद्रकाली, कोहिटीबाट नीलवाराही, यट्खाबाट कंकेश्वरी र मध्यरातमा तलेजु भवानी लगायतका पीठबाट खड्गजात्रा निकालिएको हो ।
खड्ग धारण गरेर नगर परिक्रमा गरिसकेपछि आसूरी प्रवृत्तिको प्रतीक कुभिण्डोलाई खड्गले प्रहार गरी जात्रा सम्पन्न गरिन्छ ।
खड्ग जात्रामा शक्तिपीठहरुबाट तन्त्र साधना गरी साँझ देवदेवीको मूर्ति रहेको शक्तिपीठको मूल घरबाट खड्ग जात्रा निकालिन्छ ।
कीर्तिपुरमा पनि महिलाले खड्ग जात्रा निकालेका छन् । यहाँका महिलाले खड्गको सट्टा सिन्दूर दानी बोकेर नगर परिक्रमा गरि खड्ग जात्रा निकाल्ने परम्परा रहेको छ ।
यसका साथै काठमाडौं इन्द्रचोकमा रहेको आकाश भैरवको चालं पूजा सम्पन्न भएको छ ।
विजया दशमीको दिन आकाश भैरवमा रहेको नाटेश्वरको अमूर्त मूर्तिलाई नगर परिक्रमा समेत गरिएको थियो ।
परम्परागत साँस्कृतिक बाजागाजाका साथ ठाउँ ठाउँमा भैरव र पीठ पूजासमेत गरिएको थियो ।
नगर परिक्रमापछि काठले बनेको नाटेश्वरको अमूर्त मूर्ति आकाश भैरवको मन्दिरमा विशेष पूजा गरी भित्रयाईएको थियो ।
© copyright 2016-2019 and all right reserved to jaljalakhabar | Site By : sobij
