स्वास्थ्य बीमासम्बन्धि विधेयक पारित

व्यवस्थापिका–संसद्को बैठकले ‘स्वास्थ्य बीमा विधेयक, २०७४’ सर्वसम्मतिले पारित गरेको छ।

यो विधेयक अब राष्ट्रपतिले प्रमाणीकरण गरेपछि यो कानुनका रुपमा लागु हुने छ। स्वास्थ्य विमा सम्बन्धी कानुनमा प्रत्येक नेपालीले स्वास्थ्य विमा गर्नुपर्ने उल्लेख गरिएको छ।

स्वास्थ्यमन्त्री गिरिराजमणि पोखरेलले ‘महिला, बालबालिका, ज्येष्ठ नागरिक समाज कल्याण समितिको प्रतिवेदनसहित सो विधेयकमाथि छलफल गरियोस्’ भन्ने प्रस्ताव प्रस्तुत गरेका थिए।

मन्त्री पोखरेलले हुनेबाट लिएर नहुनेलाई दिने गरी स्वास्थ्य सेवासम्बन्धी अन्य निःशुल्क कार्यक्रमलाई प्रभावकारी बनाउन सरकार प्रयत्नशील रहेको बताएका छन्।

यो विधेय पूर्व स्वास्थ्यमन्त्री गगन थापाले संसदमा पेश गरेका थिए। आफुले संसदमा पेश गरेको विधेयक पास भएकोमा थापाले  खुसी ब्यक्त गरेका छन्।

सांसदहरु केशवप्रसाद बडाल, शक्तिबहादुर बस्नेत, राजेन्द्रकुमार पाण्डे, गगनकुमार थापा, डिल्लीप्रसाद काफ्ले, मीना पुन, चूडामणि बिक जंगली, गुरुप्रसाद बुर्लाकोटी, प्रेम सुवाललगायतले संसदको छलफलमा भाग लिएका थिए।