तीन महिना बित्दा पनि भिसेरा परीक्षणको रिपोर्ट आएन

बनेपा, कात्तिक १० । एकै परिवारका चारजनाको मृत्यु हुने गरी बनेपामा भएको घटनाको तीन महिना बितिसक्दा पनि भिसेरा परीक्षणको रिपोर्ट आउन सकेको छैन ।

गत साउन ६ गते बनेपा–८ स्थित बसपार्कमा मृतावस्थामा फेलापरेका दाहाल परिवारका चारजनाको भिसेरा परीक्षणको रिपोर्ट नआउँदा घटनाको वास्तविकता सार्वजनिक हुन सकेको छैन ।

जिल्ला प्रहरी कार्यालयका प्रहरी नायब उपरीक्षक महेन्द्र मरासिनीले परीक्षण रिपोर्टले आत्महत्या भएको देखाएपनि भिसेरा रिपोर्ट नआउन्जेल निर्क्योलमा पुग्न नसकिने बताए ।

भिसेरा परीक्षणका लागि ताकेता गर्न नसकिने तर अब केही दिनभित्रै रिपोर्ट आउने अनुमान गर्दै उनले सो रिपोर्ट आएपछिमात्रै अन्य अनुसन्धान सुरु हुने जानकारी दिए ।

भिसेरा परीक्षणबाट सेल्फास नामक विषादी हो वा होइन ? कुन समयमा खाएको, सबैजनाले कुन–कुन समयमा खाएको, एकैपटक खाएको वा नखाएको भन्ने विस्तृत् विवरण आउने बताइएको छ ।

बनेपा–८ स्थित बसपार्कमा रहेको गौतम भोजनालयमा ६५ वर्षीय हरिभक्त दाहाल, ६० वर्षीया हरिमाया दाहाल, ३२ वर्षीय राजाराम दाहाल र २५ वर्षीया रञ्जना दाहाल मृतवस्थामा फेला परेपछि स्थानीय वासिन्दाले घटना रहस्मय भएको भन्दै दोषीमाथि कारबाहीको माग गरेका थिए ।

सम्पत्ति र घरायसी विवादका कारण उनीहरूले सामूहिक आत्महत्या गरेको आशंका गरिएको थियो ।

मृत फेलापरेका व्यक्ति बाबु, आमा, छोरा र छोरी हुन् । गौतम भोजनालयमा भित्रबाट ताल्चा लगाएर उनीहरूले विष सेवन गरेको र सेल्फास नामक विषादीको सिसीसमेत प्रहरीले घटनास्थलमा फेलापारेको थियो ।

उता, धुलिखेल नगरपालिका वडा नम्बर–२ का वडाध्यक्ष राजन कोइरालाको हत्यामा संलग्न व्यक्ति अझैपनि फेलापरेका छैनन् ।

प्रहरीले घटनाको सूक्ष्म अनुसन्धान भइरहेको जनाएपनि हत्यारा फेला नपर्दा घटना रहस्यमय भएको हो ।

गत भदौ ४ गते आक्रमणमा परेका वडाध्यक्ष कोइरालाको उपचारकाक्रममा काठमाडौंमा निधन भएको थियो । आक्रमणपछि उनी अर्धचेत अवस्थामा थिए । रासस