महिलाको ज्यान गएपछि ओम अस्पतालमा तनाव, सुरक्षाकर्मी तैनाथ

काठमाडौं । राजधानीको चावहिलस्थित ओम अस्पतालको लापरवाहीका कारण संघुवासभाकी एक महिलाले ज्यान गुमाएकी छन् ।

संघुवासभाकी अन्दाजी ५२ बर्षीय टंककुमारी न्यौपानेको उपचारका क्रममा विहिबार अपरान्ह ४ बजे मृत्यु भएपछि उनका आफन्त, गाउले लगायत अहिले अस्पताल परिसरमा भेला भएका छन् ।

संभावित दुर्घटनालाई मध्यनजर गर्दे अहिले अस्पताल परिसरको सुरक्षा व्यवस्था कडा पारिएको छ । अस्पताल परिसरमा उल्लेख्य संख्यामा सुरक्षाकर्मी तैनाथ गरिएको छ ।

महिनावारीको समयमा अत्याधिक रक्तश्राप भएपछि गत असोज १३ गते ओम अस्पतालको सघन उपचारकक्षमा भर्ना भएकी उनलाई चिकित्सकले विहिबार अपरान्ह मृत घोषित गरेका थिए । अस्पताल प्रशासनले विरामीको पछिल्लो दुई दिनको रिपोर्ट नदिएको तथा मृत्युको कारण पनि नभनेको भन्दै पीडीतका आफन्त प्रशासन प्रति आक्रोशित बनेका हुन् ।

उनीहरुले संघन उपचार कक्षबाट मृतकलाई बाहिर निकाल्न दिएका छैनन् । डाक्टर जाहेश्वर गौतमको नेतृत्वको टोली मृतक न्यौपानेको उपचारमा संलग्न थियो ।

समस्या समाधानका लागि अहिले पीडीतका आफन्त र अस्पताल प्रशासनबीच वार्ता चलिरहेको छ ।