उपभोक्ता समितिले सरकारलाई भन्यो– बजार अनुगमन अझ प्रभावकारी बनाउ

काठमाडौं  । व्यवस्थापिका संसदको उद्योग वाणिज्य तथा उपभोक्ता हित सम्बन्ध समितिले सरकारले जारी राखेको बजार अनुगमनलाई अझ प्रभावकारी रुपमा अघि बढाउन निर्देशन दिएको छ ।
समितिको आइतबार बसेको बैठकले यसअघि दिएका निर्देशनको सरकारले पालना गरेपनि अझ प्रभावकारी नभएको भन्दै थप सक्रियताका साथ बजार अनुगमन लगायतका काम अघि बढाउन निर्देशन दिएको हो ।
समितिका सभापति भिष्मराज आङदेम्बेले समितिले उपभोक्ताको हित र अधिकार संरक्षणका लागि सरकारले प्रभावकारी कदम चाल्नुपर्ने बताउ । उनले आम नागरिकको दैनिकीसँग जोडिएको विषय भएकाले सरकारी निकायले प्रभावकारी रुपमा बजार अनुगमन गरि कालोबजारी र अनियमितता हुन नदिन निर्देशन समेत दिए ।

बैठकमा समितिका सदस्यहरुले अघिल्लो सरकारका पालामा चीनसँग पेट्रोलियम पदार्थ ल्याउन भएको समझदारीअनुुसार काम अघि बढाउनेबारे समितिमा छलफल गर्नुपर्ने धारणा राखेका छन् ।
समितिका सदस्य नारायण खड्काले चीन सरकारसँग तत्कालीन प्रधानमन्त्रीको भ्रमणका क्रममा भएका समझदारीलाई कार्यान्वयन गर्न प्रभावकारी कदम चाल्नुपर्ने बताए ।
यस्तै समिति सदस्य छायाँ शर्मा पन्तले आपूर्ति मन्त्रालयले केही दिनअघि चीन सरकारसँग गरेको समझदारीपत्रलाई समितिमा छलफल गर्नुपर्ने बताए ।