नेकपा एमालेका उपाध्यक्ष बामदेव गौतमले संविधान पूर्णरुपमा कार्यान्यन नभएसम्म एउटा धारा त के संविधानमा भएको ‘कमा’ र ‘फुल स्टप’ पनि संशोधन गर्न नदिने बताएका छन् ।
प्रेस चौतारी कास्कीले पोखरामा आयोजना गरेको पत्रकार सम्मेलनमा गौतमले अहिले संविधानको संशोधनको कुरा उठिरहेको बताउँदै उनले संविधानमा भएको ‘कमा’ र ‘फुल स्टप’ पनि संसोधन नदिने बताए।
‘संविधानमा केही संसोधन गर्नुपर्ने छ तर एमालले संविधान पूर्ण कार्यान्यन नभएसम्म संसोधन गर्न दिँदैन,’ उनले भने। नेपाली कांग्रेस, माओवादी केन्द्र र मधेसवादी दलबीच भएको संविधान संशोधनको सहमतिप्रति लक्षित गर्दै उनले संसदमा संविधान संसोधनका लागि प्रस्ताव पेश भएमा त्यसको विपक्षमा एमाले उत्रने बताए।
संविधानले निर्धारण गरेका ७ प्रदेशमा पनि कुनै पनि प्रदेशको ‘एक इन्च’ जमिन दायाँबायाँ गर्न नदिने गौतमले बताए। उनले देशलाई टुकर्याउन र विखण्डन गर्ने गरी प्रदेशको एक इन्च जमिन पनि तलमाथि हुन नदिने बताए । पूर्व गृहमन्त्रीसमेत रहेका गौतमले नेपालमा कार्यकारी राष्ट्रपतीय शासन आवश्यक रहेको बताए ।
उनले एमाले कार्यकारी राष्ट्रपति शासनको पक्षमा रहेको बताउँदै अबको ५/७ वर्षमा कार्यकारी राष्ट्रपतीय शासन सुरू हुने बताए । गौतमले अहिलेको सरकार कामचलाउ मात्रै भएको टिपणी गरे । उनले यो सरकार देशलाई धरासायी बनाउनका लागि गठन भएको आरोप लगाउँदै राष्ट्रिय हितको काम गर्न नसक्ने बताए ।
