विदेश जाने खर्चले नेपालमै नयाँ उपकरण किनौँ : डा. भट्टराई

काठमाडौं ।  पूर्व–राष्ट्रपति डा.रामवरण यादवको उपचारको विषय पारेर नयाँ शक्ति नेपालका संयोजक डा. बाबुराम भट्टराईले नयाँ बहस शुरु गरेका छन् । उनले भीभीआइपी र भीआइपीको विदेशमा हुने उपचार खर्च नेपालकै स्वास्थम क्षेत्रमा लगानी गर्न सुझाव दिएका छन् ।

मंगलवार विहान ट्वीटरमार्फत भट्टराईले उपचार गर्न विदेश जाने खर्चले देशमै राम्रा उपकरण ल्याए राम्रो हुने बताएका छन् । उनले भनेका छन्, ‘नेपाली विदेशमा उपचार गर्न जाने यहाँ दक्ष डाक्टर नभएर हैन, अत्याधुनिक उपकरण नभएर हो ।’

एक वर्षको विदेश जाने खर्चले देशमै नयाँ उपकरण भित्र्याएर नेपालमै उपचार गराउन पाए सबैभन्दा राम्रो र महत्वपूर्ण उपलब्धी हुने बताएका हुन् ।

गत शुक्रबार कांग्रेस सभापति शेरबहादुर देउवा उपचारको लागि पत्नीको साथ सिंगापुर गएका थिए । त्यस्तै, एमाले अध्यक्ष केपी शर्मा ओली पनि गत मंगलबार नै उपचारको लागि भन्दै सिंगापुर गएका छन् ।

यस्तै पूर्वराष्ट्रपति डा. रामरण यादवलाई क्यान्सर देखिएपछि उनी पनि उपचारको लागि अमेरिका जाँदैछन् । उपचारको लागि सरकारले उनलाई पेस्की स्वरुप सरकारले ६० लाख दिएको छ ।