गाउँका स्वास्थ्यचौकीमै मिर्गाैला परीक्षण गर्ने तयारी

काठमाडौँ । सरकारले अब गाउँका स्वास्थ्यचौकीमा नै मिर्गाैलामा खराबी भए/नभएको पत्ता लगाउन सकिने व्यवस्था गर्ने तयारी गरेको छ ।

मिर्गाैला खराब भए/नभएको पत्ता लगाउन प्रयोग गरिने ‘डिपिस्टिक किट’ (औषधि उपकरणको पोका) देशभरका सबै स्वास्थ्यचौकीमै उपलब्ध गराइएपछि सो सेवा उपलब्ध हुने भएको हो । स्वास्थ्य मन्त्रालय, आपूर्ति व्यवस्थापन विभागले मनाङ बाहेक ७४ जिल्लाका सबै स्वास्थ्यचौकीमा पहिलो चरणमा २० लाख किट पठाइसकेकोे छ ।

महाशाखाका निर्देशक डा भीमसिंह तिनकरीले मनाङमा बाटाको समस्याका कारण कीट पठाउन नसकिएको बताउँदै एक सातामै त्यहाँ किट पठाउने जानकारी दिए । क्षेत्रीय, उपक्षेत्रीय, अञ्चल र जिल्ला अस्पताल, जिल्ला जनस्वास्थ्य कार्यालय लगायत गरी १३३ स्वास्थ्य संस्थामा पुग्ने गरी किट वितरण गरिएको महाशाखाले जनाएको छ । जिल्ला जनस्वास्थ्य कार्यालयमा पुगेको किटलाई स्थानीय आवश्यकतानुसार मातहतका प्राथमिक स्वास्थ्य केन्द्र र स्वास्थ्यचौकीमा पठाउने बताइएको छ ।

निर्देशक तिनकरीले २० मिलिलिटर पिसाबले किट भिजाएपछि देखिने किटको रङका आधारमा मिर्गाैलाका अवस्थाका बारेमा थाहा पाउन सकिने बताए  । परीक्षणमा पहिलो पल्ट कुनै खराबी नदेखिएमा एक वर्षपछि पुनःअर्को परीक्षण गर्नुपर्ने उनको भनाइ छ ।

मन्त्रालयले यसै वर्ष विद्यालयमा स्वास्थ्यकर्मीसहित किट पठाएर विद्यार्थीको मिर्गौला परीक्षण गर्ने तयारी समेत गरेको छ । मन्त्रालयले सबै ठाउँमा पायक पर्ने स्वास्थ्य संस्थामा गई आफ्नो मिर्गाैला जाँच गरी सेवा लिन सबैमा आग्रह गरेको छ ।