सधैँ कहिले यस्तो देखिएला राजधानी ?

काठमाडौँ । नेपाल जलस्रोतमा विश्वकै धनी देशहरु मध्ये पर्छ । तैपनि देश उर्जाको समस्याले आक्रान्त छ । राजधानी काठमाडौँमै १७ घण्टासम्म लोडसेडिङको मार खेप्नुपर्छ । पूरै राजधानी बत्तीको उज्यालोमा कहिल्यै धपक्क बल्दैन । कुनै न कुनै कुनालाई अन्धकारले छोपेकै हुन्छ ।

तर, एक जुगमा एक दिन भनेझैँ, वर्षमा एक दिन भने राजधानी धपक्कै बल्छ । झिलिमिली रंगीन बत्तिको उज्यालोले सिंगारिएको काठमाडौँ बेहुलीभन्दा कम सुन्दर देखिँदैन । बिरलै आउने दिन हो तिहार ।

लक्ष्मी पूजाको दिन यही तस्विरलाई क्यामारामा कैद गर्न काठमाडौँ छेउका डाँडाकाँडा घुमेँ । साँझ ५ बजे झोलामा क्यामेरा भिरेर निक्लेको स्वयम्भु, इचंगु, रामकोट, सेतो गुम्बा घुमेर घर फर्कदाँ रातको ठ्याक्कै ११ बजेछ ।