समाजवाद अध्ययन केन्द्रको निमन्त्रणमा उत्तर कोरियाली टोली काठमाडौँमा

काठमाडौँ । उत्तर कोरियाली समाजवाद अध्ययन केन्द्रका प्रमुख वाङ छुन नेतृत्वको तीन सदस्यीय एक टोली काठमाडौंमा आएको छ ।

नेपाल कोरियाली समाजवाद अध्ययन केन्द्रको निमन्त्रणमा आएको प्रतिनिधि मण्डलले उत्तर कोरियाको समाजवाद विकासबारे प्रशिक्षण दिन काठमाण्डौ आएको हो ।

विहिबार नेत्रविक्रम चन्द विप्लव नेतृत्वको माओवादीले शुभकामना आदान प्रदान कार्यक्रमको आयोजना गरेर भ्रमण टोलीको बारेमा जानकारी गराएको हो । नेपाल कोरिया समाजवाद अध्ययन केन्द्र विप्लव नेतृत्वको माओवादीको भातृ संगठन हो । कोरियाको समाजवादबारे विश्वलाई जानकारी दिन कोरियन एसोसिएसन फर सोसल साइन्टिष्टले सरकारको प्रतिनिधित्व गर्दै विश्व भ्रमण गर्दछ । यो प्रतिनिधि मण्डलले काठमाडौं बसाइको क्रममा शुक्रबार काभ्रेको धुलिखेलस्थित एक होटलमा विप्लव नेतृत्वको माओवादी पार्टीका कार्यकर्तालाई प्रशिक्षण दिने कार्यक्रम तय भएको छ ।