संघर्षपूर्ण जीतसँगै रियललाई पछ्याउँदै बार्सिलोना

सेभिया । एक गोलले पछि परेको स्थिति उल्टाउँदै बार्सिलोनाले सेभियाविरुद्ध २–१ को महत्वपूर्ण जीत हासिल गरेको छ । जीतसँगै बार्सिलोनाले शीर्ष स्थानमा रहेको रियल म्याड्रिडसँगको दुरी २ अंकमा झारेको छ ।

आइतबार भएको खेलमा रियलले लेगानेसलाई ३–० ले हराउँदै शीर्ष स्थानमा ५ अंकको अग्रता बनाएको थियो ।

सेभियाको घरेलु मैदानमा भएको खेलमा बार्सिलोना खेलको १५ मिनेटमा नै पछि परेको थियो । शुरुदेखि बार्सिलोनामाथि दबाब राखेको सेभियाका लागि भिटोलोले गोल गर्दै अग्रता दिलाए ।

तर, पहिलो हाफ सकिन लाग्दा लियोनेल मेस्सीले बराबरी गोल गरे । यो बार्सिलोनाका लागि उनको ४६९ औं गोल थियो । सेभियाविरुद्ध उनको यो २७ औँ गोल पनि थियो ।

खेलको दोस्रो हाफमा लुइस सुवारेजले निर्णायक गोल गर्दै बार्सिलोनालाई महत्वपूर्ण ३ अंक दिलाए ।

११ खेलपछि बार्सिलोनाको २५ अंक रहेको छ ।

हिजो भएको अन्य खेलमा भिल्लेरियालले रियल बेटिसलाई हराउँदै लिगको तेस्रो स्थानमा उक्लिएको छ ।