‘घरेलु हिंसाबाट लागेको चोटलाई मेकअपले कसरी लुकाउने ?’ बन्यो विवादको ‘बिऊ’

‘घरेलु हिंसाबाट लागेको चोटलाई मेकअपले कसरी लुकाउने’, मोरोक्कोको सरकारी टेलिभिजनमा प्रसारित एक कार्यक्रममा जब यसबारे भिडियो देखाइयो तब सोसल मिडियाम हंगामा मच्चिएको छ ।

कार्यक्रममा मेकअप आर्टिस्टले घरेलु हिंसापछि लागेको चोटलाई फाउन्डेसन लगाएर कसरी लुकाउने भन्ने जानकारी दिन्छिन् । त्यसपछि उनी भिन्न–भिन्न किसिमका फाउन्डेशनमाथि चर्चा गर्छिन् ।

उक्त कार्यक्रम पछि ठूलो संख्यामा मानिसहरुले सोसल मिडियामा आफ्नो रिस व्यक्त गरेका छन् । यसका साथै मानिसहरुले महिलाप्रति हिंसालाई यति हल्का तरिकाले लिएको विरुद्ध फेसबुकमा मुद्दा चलाएको छ जसलाई हज्जारौं मानिसहरुले आफ्नो समर्थन जताइसकेका छन् ।

मोरोक्कोका मानिसहरुले मिडिया वाचडग हाका (हाई अथोरिटी अफ अडियोभिजुअल कम्युनिकेशन) सँग च्यानलविरुद्ध कडा एक्सन चाल्नुपर्ने माग गरेका छन् ।

पछि यो कार्यक्रमका लागि माफी माग्दै च्यानलले भन्यो, ‘कार्यक्रम निकै अनुपयुक्त थियो । यसले मानिसहरुको भावनामाथि चोट पुग्यो यसको लागि हामी माफी माग्छौं । हामी स्विकार गर्छौं कि यो एउटा ठूलो सम्पादकीय भुल भएको छ ।’

यद्यपी, च्यानलले माफी मागेपछि पनि मानिसहरुको रिस कम भएको छैन ।

एक फेसुबक प्रयोगकर्ताले लेखेकी छिन्, ‘कस्तो राम्रो खबर । अब मलाई मेरो श्रीमानले पिटे पनि कुनै चिन्ता छैन । अब म निकै आरामसँग सुत्न सक्छु । मेरो पिटाई भए म झटपट मेकअप गर्नसक्छु । काम तमाम ।’

एक अन्य फेसबुक प्रयोगकर्ताले लेखे, ‘च्यानलले माफी माग्दैमा के यो मुद्दा सिद्धियो ? मिडिया वाचडगले यो च्यानललाई कडा चेतावनी दिनु पर्छ ।’

एक अर्का फेसबुक प्रयोगकर्ताले च्यानललाई प्रश्न गरेका छन्, ‘के ब्लेडले लागेको चोट पनि मेकअपले हटाउन सक्छ ?’