शुक्रराज ट्रपिकल अस्पतालमा स्रोत साधनको अभाव

काठमाडौ । सरुवा रोगको निदान गर्ने जिम्मेवारी पाएको एक मात्रै सरकारी अस्पताल शुक्रराज ट्रपिकल तथा सरुवा रोेग अस्पतालमा आधारभूत स्रोत साधनकै अभाव देखिएको छ ।
अस्पतालले आधारभूत स्रोत साधनका अभावमा नयाँ–नयाँ रोगको चुनौतिको कामना गर्न कठिनाई भएको जानकारी दिएको हो । अस्पतालको ८३ औं स्थापना दिवसको अवसर पारेर काठमाडौंमा आयोजित कार्यक्रममा बोल्दै अस्पतालका निर्देशक डा. रमेशकुमार खरेलले सरकारले अस्पतालका लागि आवश्यक स्रोत साधन जुटाउन सहयोग नगरेको गुनासो गरे ।
डा. खरेलले भने,
–सरुवा रोगको चुनौतिको सामना गर्न अनुसन्धान केन्द्र स्थापना गर्नुपर्ने सपना अझै पुरा हुन सकेन । – सरकारले अस्पतालका लागि यस वर्ष १२ करोड ६९ लाख ९९ हजार बजेट मात्रै छुटयायो यो अपुग छ ।
– छुट्याएको बजेट रेविज रोगको रोकथामका लागि मात्र ठिक हुन्छ ।
यसैबीच अभावकैबीच अस्पतालले आफनो स्थापना दिवसको अवसर पारेर सिटी स्क्यान सेवा विस्तार गरेको छ । सेवाको शुभारम्भ गर्दैै स्वास्थ्य राज्य मन्त्री तारामान गुरुङले अस्पतालले गुणस्तरीय सेवा दिने विश्वास व्यक्त गरे । मन्त्री गुरुङले नयाँ नयाँ सरुवा रोगको चुनौतिको सामना गर्न अस्पतालले प्रयास गर्दै जानेमा आफु विश्वस्त रहेको बताए ।
शुक्रराज ट्रपिकल तथा सरुवा रोग अस्पताल सहिद शुक्रराज शास्त्रीको नाममा स्थापना गरिएको सरुवा रोग सम्बन्धि नेपालको सरकारी अस्पताल हो । अस्पतालले सरुवा रोगको चुनौतिको सामना गर्ने प्रतिवद्धता समेत जनाएको छ । इबोला, मर्स कोरोना भाईरस, बर्ड फ्लू, स्वाईन फ्लूजस्ता प्राण घातक सरुवा रोग नियन्त्रणका लागि सरकारले ठूलो धनराशी खर्च गर्दै आएको छ ।