दोश्रो युवा वैज्ञानिक सम्मेलन सम्पन्न

काठमाडौं । युवा वैज्ञानिक तथा प्राविधिकहरुलाई देशभित्रै आफ्नो क्षमता र दक्षताको सदुपयोग गर्न तथा नव प्रतिभाहरुलाई प्रोत्साहन गर्ने उद्धेश्यले “हाम्रा वैज्ञानिकः हाम्रो शक्तिः हाम्रो आशा” को मूलनारा सहित त्रिभुवन विश्वविद्यालय, व्यवहारिक विज्ञान तथा प्रविधि अनुसन्धान केन्द्र (रिकास्ट)को मुख्य आयोजना र ब्रेनीक्यूव रिसर्च अर्गनाइजेशन तथा नेपाल पोलिमर इन्टिच्यूटको सह आयोजनामा माघ १५ र १६ गते किर्तिपुरकोे भौतिकशास्त्र केन्द्रिय विभागमा दोश्रो युवा वैज्ञानिक सम्मेलन सम्पन्न भएको छ ।
देशबाट यूवा वैज्ञानिकहरुको विदेश पलायन भइरहेको सन्दर्भमा नीति निर्माता तथा प्राज्ञहरुमा यस सम्मेलनले सरकारलाई आवश्यक सुझाव दिन सक्ने आशा रिकास्टका कार्यकारी निर्देशक प्रा.डा. रामेश्वर अधिकारीले राखेका थिए ।
कार्यक्रमको उद्घाटन पूर्व विज्ञान,प्रविधि तथा वातावरण मन्त्री गणेश साहले गरेका थिए भने नेपाल यूवा परिषदका कार्यकारी उपाध्यक्ष माधव ढुङ्गेलले कार्यक्रमको उपदेयिता बारे प्रकाश पारेका थिए ।
नेपाल विज्ञान तथा प्रविधि प्रज्ञा प्रतिष्ठान (नास्ट) का सदस्य सचिव बुद्धि रत्न खड्गी, त्रिभुवन विश्वविध्यालय, विज्ञान तथा प्रधानमन्त्रीका वैज्ञानिक सल्लाकार डा.रविन्द्र प्रसाद ढकाल, त्रि.वि भौतिक शास्त्र विभागका प्रमुख प्रा.डा. बिनिल अर्याल लगायतले यूवा वैज्ञानिकको वर्तमान भूमिका र महत्व बारे प्रकाश पारेका थिए ।
सम्मेलनको प्राविधिक सत्रमा विश्व प्रजातान्त्रिक यूवा महासंघका पूर्व उपाध्यक्ष तथा नेपाल अध्ययन केन्द्रका अनुसन्धानविद तथा सामाजिक अभियन्ता योगेन्द्र शाहीले “मानव विकास, वैज्ञानिक आविष्कार, यूवा तथा सामाजिक न्याय” विषयमा कार्यपत्र प्रस्तुत गरेका थिए ।
नेपाल प्राकृतिक सम्पदाले भरिपूर्ण भएपनि अपेक्षित उपलव्धि हुन नसक्नुमा यूवा वैज्ञानिकहरुको चिन्ता एवं. यसका सावधानको उपाय वारे छलफल गरिएको थियो ।
सम्मेलनको दोश्रो दिन शेख इद्रिस शिक्षा विश्वविध्यालय मलेसियाका प्रा. रामली मुस्तफाले विद्यार्थी तथा युवा वैज्ञानिकहरुलाई समयको तालमेल मिलाई आफ्नो लक्ष्यमा अघि बढ्न आवहन गरे । त्यस्तै नास्टका प्राज्ञ डा. दिनेश राज भूजुले नेपालमा प्रतिभाहरुको कमि नभएपनि उनिहरुलाई अवसरको अभाव रहेको बताए ।
कार्यक्रमको समापन समारोहमा विज्ञानका विभिन्न विधामा यान्त्रिक तथा सैद्धान्तिक एवं. व्यवहारिक अनुसन्धानको विषयमा सफल हुने प्रतियोगीहरुलाई पुरुस्कार तथा प्रमाणपत्र प्रदान गरि सम्मान गरिएको थियो ।