शिशुको मृत्युपछि पाटन अस्पतालमा तनाव

काठमाडौं । गत माघ १७ गते राजधानीको धापासीकी प्रमा थकालीलाई प्रसव व्यथा लागेपछि ललितपुरको पाटन अस्पतालमा भर्ना गरियो । प्रमाले सोहि अस्पतालमा गर्भ बसेसँगै चेकजाँच गराउँदै आएकी थिइन् ।
अस्पतालमा भर्ना भएसँगै सोहि दिन उनले दुई शिशुको जन्म दिइन् । प्रमाकी सासु अनिताका अनुसार पहिलो बच्चालाई अस्पतालले भ्याकुम प्रयोग गराएर निकालेको थियो भने दोस्रो बच्चा त्यसको केहि मिनेटपछि सामान्य अवस्थामै जन्मिएको थियो ।
यद्यपी जन्मिँदै पहिलो बच्चाको टाउकोमा सामान्य चोट देखिएको उनको भनाई छ । चोटकै कारण बच्चालाई आइसियुमा १२ राखिएको थियो भने एन्टिबायटिक पनि चलाइएको थियो । १२ घण्टापछि सामान्य वार्डमा सारिएको बच्चा शुक्रबार पुन एकाएक सिकिस्त हुन पुगेका थिए ।
सिकिस्त बच्चालाई पुनः आइसियुमा राखेपछि चिकित्सकहरुले बच्चाको अवस्था जटिल रहेको भन्दै जे पनि हुन सक्ने जवाफ दिएका थिए । तर, आफन्तले अस्पतालको लापरबाहीले सामान्य अवस्थामा आइसकेका बच्चा एकाएक बिरामी भएको आरोप लगाउँदै हाइडोजको औषधि प्रयोग गरिएकै कारण सो अवस्था आएको आरोप लगाए । अनिताले सामान्य अवस्थाको बच्चालाई अस्पतालले लापरबाही ढंगले हाइडोजको औषधि चलाएकै कारण यस्तो अवस्था भएको दाबी गरिन् ।
बच्चाको अवस्था जटिल बनेपछि आइसियुमा राखिँदा चिकित्सकहरुले गम्भीर भएर उपचार गर्नुको साटो उल्टै अब बच्चाको आस गर्न नसकिने भन्दै हतोत्साहित बनाउने काम गरेको अनिताले बताइन् । अस्पतालकै लापरबाहीले एकाएक बच्चा सिरियस भएको र हतोत्साहित पनि गराउने काम भएपछि आफूले स्वास्थ्य मन्त्रालयमा कार्यरत आफन्तलाई फोन गरेर सबै घटना सुनाएको र मन्त्रालयबाट अस्पतालमा फोन गरिएपछि गम्भीर भएर उपचार थालिएको उनको भनाई छ । तर, आइसियुमा उपचारकै क्रममा शिशुको शुक्रबार राती ११ः५० मा मृत्यु हुन पुग्यो ।
‘मन्त्रालयबाट अस्पतालमा फोन गएछ, त्यसपछि बच्चाको अल्ली केयर गरिएपछि मृत्यु भयो’, उनले रातोपाटीसँग भनिन्, ‘अस्पतालकै लापरबाहीले मृत्यु भएको हो, घटनाको छानबिन नभएसम्म हामी शब बुझ्दैनौं ।’
उनका अनुसार अस्पतालका प्रमुखले शब बुझेर लैजान भन्दै तीब्र दवाव दिएका दिइरहेका छन् । तर घटनाको छानबिन र दोषीमाथि कारबाही नभएसम्म शब नबुझने उनको भनाई छ । घटना रहस्यमय भएको भन्दै उनले भनिन्, ‘मन्त्रालयको फोनपछि अस्पताल प्रशासन गम्भीर त भयो । अघिसम्म शिशु नबाँच्ने भन्ने डाक्टरहरुले राती साढे १० बजेसम्म अवस्था सुधारोत्मुक रहेको बताएका थिए ।’
उनका अनुसार अर्को बच्चा र आमाको अवस्था सामान्य रहेको छ भने उनीहरुलाई डिस्चार्ज गरिएको छ ।